Áigot hukset lasi Fovsen njaarke orohaga eatnamiin

Statnett, mii oamasta ja hálddaša Norgga el-rávdnje rusttegiid, áigu hukset ođđa el-fápmolinjá Fovsen njaarke orohaga dálveguohtumiid čađa Trøndelágas.

Maŋŋá bieggaturbiinnaid huksemiid, lea boazodollui báhcán guokte dálveguohtunguovllu. Dál dat plánejuvvo 420 kV el-fápmolinjá rastá nuppi dien guovtti dálveeatnamiin mat vel leat báhcán.

Orohaga máttimus siidda (Sør Fosen Sijte) advokáhtta, Eirik Brønner, lohká dán ge huksema rihkkut Fovsen-sámiid olmmošvuoigatvuođaid, seamma láhkai go dat beakkán Fovsen-duopmu, man birra juo lea leamaš olu sáhka.

– Lea áibbas čielggas ahte ON olmmošvuoigatvuođakonvenšuvnna rihkkojuvvo, jos el-rávdnjelinjá huksejuvvo vel daid dálveeatnamiid ala mat vel leat báhcán ealáhussii, lohká Brønner NRK:ii.

Boazdoallit ja Sámediggi leat dáhtton eiseválddiin čoahkkima dán ášši birra.

Álgo huksenlohpi addui Statnettii juo 10 jagi dassái, ja Statnett áiggošii dál huksegoahtit el-fápmo linjá, eai ge áiggo vuordit dassái go ášši čielggaduvvo dikkis dahje eiseválddiid ja boazodolliid ráđđádallamiin.

– Nu go juo buot stuorát huksemat dahket, de dieđusge váikkuha dát ge huksen movt nu lundui ja birrasii. Min bargu lea čađahit doaimmaid daid njuolggadusaid ja eavttuid vuođul maid eiseválddit leat mearridan, lohká Statnett ovddasvásideaddji diehtojuohkki, Håkon Smith-Isaksen Holdhus.

Sihke Sis-Fovsen suohkan (Indre Fosen) ja boazodoallit leat ávžžuhan Statnett bidjat el-fápmolinjá mearabotni mielde, ja nu eastadit stuorát huksemiid orohaga dálveeatnamiin.

Ná ávžžuhedje juo dalle 10 jagi dassái go šaddagođii sáhka dán el-rávdnjelinjá huksemis. Statnett lohká šaddat menddo divrras el-rávdnjekabela bidjat mearabotni mielde.