– Mun áiggun evttohit boahtte searvegotteráđi čoahkkimis ahte girku ii galgga šat láigohuvvot konsearttaide, lohká Nils Henriksen.
Mannan vahkus čoahkkanii Guovdageainno searvegotteráđđi. Čoahkkimis sii geahčade earet eará njuolggadusa mii hilgu luođi girkui.
Guovdageainno searvegotteráđđe-láhttu Nils Henriksen oaivvilda ahte girkus ii leat doarvái buorre dárkkisteapmi go láigohit girku nugo konsearttaide, ja danin áigo evttohit ahte girku ii galgga sáhttit láigohit konsearta doaluide.
– Mis ii leat doarvái buorre dárkkisteapme, das maid artista boahtá dahkat iežas konsearttas girkus.
Henriksen čilge ahte máilmmebeakkan trompehta čuojaheaddji, Ole Edvard Antonsen, ii livčče oba galgat ge beassat lágidit konsearta Guovdageainno girkus, go son lea almmuhan CD-skearru, mas lei maid dat luohti maid son ovdanbuvttii Guovdageainno girkus.
- Duogáš dieđut:
Boares njuolggadusat čavgejuvvojit
Girkus leat badjel logi jagi boares njuolggadusat makkár lágidemiide girku sáhttá láigohit.
Viđat njuolggadussii lea čállon:
Searvegotteráđđi ii atte lobi juoigat, dánsut dahje teáhterčájálmasa čájehit Guovdageainno ja Máze girkus.
Dán njuolggadusa árvvoštalai searvegotteráđđi, mas boahtá árvideames šaddát jienasteapmi boahtte ráđđečoahkkimis guovvamánus boahtte jagi.
Henriksen, leago dus eanetlohku mii doarju du evttohusa?
– Dan mun in dieđe, muhto mun dieđan moaddása geat dorjot dan evttohusa, vástida son.
Searvegotteráđis leat 7 ráđđeláhtu.
Nils Henriksen lea válljejuvvon nubbinjođiheaddji ja doaibmagoahtá dán doaimmas jáhkemolsašumis.
– Luohti gullá juohkesadjái
Multidáiddár Ailloš ii leat mielas dasa ahte girku bidjá ráji luohtái.
– Luohti lea agibeaivve gullan eallimii. Juohke sajis gos sápmelaš lea, dege son gii juoigá fuolatkeahttá báikkis ja áiggis ja dilis, muhto dat leat baicca olbmot geat bidjet dieid rájiid ahte muhtin sadjái máhkaš ii gula, lohká Ailloš.
Juoigi Ingor Ánte Áilu «Ailloš» Gaup, lea ovdal juoigan girkus, sihke Danmárkkus ja Amerihkás, muhto dalle lei son bovdejuvvon.
– Doppe lei hui buorre juoigat, go olbmot válde mu bures vuostá, lohká son.
– Divttán sin leat ráfis
Áilloš dohkkeha goitge Guovdageainno girku searvegotteráđi njuolggadusa mii hilgu juoigat luođi girkus.
- Dat lea eanaš boarráset geardi mii lea hui vuostá luođi gullomis girkus. Dat lea sin oskku ja mun anán dan arvvus, in ge boađe sin vuorjat, loahpaha Áilloš.