Áiggošit unnidit doarjaga

Ruhtadoarjja glutenkeahtes buktagiidda sáhttá unniduvvot Norggas. Eiseváldit áigot dál guorahallat dan ekonomalaš doarjaga mii juolluduvvo sidjiide geain lea cøliakia dahje eará čoalledávddat ja eai gierdda glutena, mii gávdno jáffuin. Dál sáhttá oažžut birrasii 24.000 ruvnnu jahkásaččat, mii manná gokčat liigegoluid, muhto guorahallamat maid SIFO lea dahkan eiseváldiid ovddas, čájehit ahte liigegolut leat mealgat unnit. Cøliakijasearvvis oaivvildit ahte eiseváldit eai berre heittihit doarjaga, muhto baicca čavget eavttuid dasa gii galgá oažžut dan ruhtadoarjaga.