NRK Meny
Normal

Áiggošit heaittihit Ráissa skuvllaid

Ráissas áiggošedje heaittihit buot suohkan giliskuvllaid seastin dihtii ruđa.

Skole illustrasjon
Foto: Scanpix / SCANPIX

Ráissa eallindililávdegotti eanetlohku áiggošii heaittihit buot gieldda giliskuvllaid ja dáinna lágiin seastit 15 miljovnna ruvnno jahkásaččat.

Nu muitala lávdegotti jođiheaddji ja ovddádusbellodatáirras Bjørn Garden. Son oaivvilda ahte sámi oahppiide šattašii ná buoret dilli go de čohkkejuvvošedje ovtta skuvlii.

Ferte seastit sullii 10 miljovnna

Ráissa gielda ferte seastit sullii 10 miljovnna ruvnno jahkásaččat. Dán oktavuođas evttoha ge eallindililávdegotti jođiheaddji Bjørn Garden heaittihit golbma giliskuvlla, namalassii Cohkolatjoga, Ákšovuonna ja Reaššegietti skuvllaid.

Dáin skuvllain leat dál 165 oahppi, geat de šattašedje johttit gielddaguovddážii Hánssagieddái skuvlii.

– Nu seasttášii suohkan 15 miljovnna jahkásaččat, muitala Garden.

Eallindililávdegoddi gieđahalai ášši mannan vahkus ja doppe háliidii eanetlohku heaittihit dáid skuvllaid, njealjis dorjo evttohusa ja golmmas fas manne vuostá. Ihttin galgá ovdagoddi meannudit ášši.