– In dieđe lea go riekta dadjat «guovddáš» – baicce «luohtevuorká». Guovddáš orro nu stuoris leamen.
Nie čilge guovdageaidnulaš Håkon Isak Vars.
Dokumeanttaid bokte, maid NRK lea ožžon guovllastit, boahtá ovdan ahte son ja eará áŋggirdeaddjit áiggošedje ásahit «luohteguovddáža» Guovdageidnui vuođđudusa hámis.
Háliida seailluhit dološ luđiid
– Lea gal ila árrat dadjat. Muhto lunddolaš dieđus lea čohket ja vurket luđiid ja leudema miehta Sámi. Daid berrešii de dahkat almmolažžan, nu ahte buohkat besset gullat daid, ja maid oažžut dieđuid luođi ja juoigi birra. Muhto ii dat bargu leat ollen guđege muddui vuos, muitala Håkon Isak Vars.
Ovddalgihtii gávdnu gal juoigansearvi mii lea juo máŋgga jagi doaimmas leamaš. Dasa lassin álggahuvvui duvle eará ođđa searvi; «Juoigalasat».
– Leago dárbu diekkár «vurkii» dahje «guovddážii», go juo «Juoigalasat»-nammasaš searvi dál lea ásahuvvon?
– Diet lea searvi mii bargá seamma guvlui, ja soaitá šaddat ovttasbargoguoibmi ja mieleaiggát dan «guovddážis». Muhto das ii leat mihkkege formálaid vel dahkon, muhto mii leat gal gulahallan. «Juoigalasat» dieđus boahtá bargat stuora oasi čohkkenbarggus, dieinna vugiin ahte báddet otná juigiid.
– Muhto guovddáš galggašii bargat maiddái boares luđiid čohket ovtta diehtočoakkáldahkii – luođit mat gávdnojit vuorkkáin feara gos Sámis, fástida Vars.
- Loga maiddái: Háliida álggahit luohterevolušuvnna
Ruhtadeapmi vuos eahpečielggas
– Mis galggašii čoahkkin gávnnahit maid guovddáš gálga bargat, ja maid guhtege ovttasbargoguoibmi galgá bargat. Dat geaiguin dán rádjai lea formálalaš gulahallan leamaš lea Sámi allaskuvla, Sámi vuorká ja Guovdageainnu suohkan.
NRK lea maid gulaskuddan Sámi vuorkká jođiheddjiin, Øystein Steinlien. Son muitala ahte Sámi vuorká lea mielde leamaš ságastallamiin luohteguovddáža ásaheami, muhto čujuha Håkon Isak Varsii eanet dieđuid hárrái.
– Sámi vuorkkás han lea gelbbolašvuohta diekkár bargui, ja dat lea hui dehálaš jus galgá sihkkarastit kvalitehta ja duođalašvuođa dákkár barggus.
– Ruhtadeapmi lea maid oassi maid šaddat sagastallat. Gávnnahit vuos masa manná ruhta, man ollu, ja lunddolaš lea Sámedikkis ohcat doarjaga.
- Loga maiddái: – Šállošahtti ahte mánát eai oahpa juoigat
- Loga maiddái: Áhkku, eadni, ja áhkkut juiget seamma skearrus
Sátnejođiheaddji ii lohpit maidige
– Lean ilus ahte barggat dáinna. Mus lea jáhkku ahte lihkostuvat prošeavttain, erenoamážit jos ovttasbargá eará ásahusaiguin mat leat juo doaimmas.
Nie lea Guovdageainnu suohkana sátnejođiheaddji Johan Vasara čálalaččat fástidan Håkon Isak Varsii.
– In sáhte gal suohkana bealis lohpidit ahte šaddat searvat vuođđudusa dahje ossosa ásaheapmái, go dan fertet mii dárkileappot ságaškuššat – áinnas go lehpet beanta muttos juo ollen prošeavttain, lea Vasara maiddái čállán Varsii.
Vasara čállá ahte áinnas veahkeha gal smávit doaibmabijuiguin, guovddáža ásaheami várás.
– Muhto suohkana bealis eat searvva prošeavttaide dien dásis, álgobáliid baicce doarjut praktihkalaččat ja politihkalaččat. Dasto ferte oaidnit leago gánnáhahtti searvat nugo ovdamearkka dihtii osolažžan, čállá Vasara oanehaš liigekommentáras NRK:i.
- Loga maiddái: Eadnis heittii juoigamis oskku dihte