NRK Meny
Normal

Dáiddamuseaplánat stáhtačállái

Kultur- ja girkodepartemeantta stáhtačálli beasai oaidnit man unnán sadji lea čájehit ja vurkkodit sámi dáidaga. Otne sutnje geigejuvvojedje ođđa dáiddamuseaplánat.

Irene Snarby ja Randi Øverland.
Foto: Dan Robert Larsen / NRK

Sámiid Vuorká-dávvirat (SVD) Kárášjogas leat dál ráhkadan plána dahje nugohčoduvvon latnjadárboprográmma, mas boahtá ovdán makkár arealadárbu boahttevaš sámi dáiddamuseas lea. Prográmma geavahuvvo vuođđun go de ohcet ovdaprošeaktaruđaid. Ovdaprošeakta lea dasto  vuođđun ieš huksenprošeaktaohcamuššii. Otne geigejuvvui dát latnjadárboprográmma kultur- ja girkodepartemeantta stáhtačállái, Randi Øverland.

Gáržžes čájáhusbáiki ja vuorká

 

Randi Øverland
Foto: Dan Robert Larsen / NRK

- Ii leat ráhpa sturrodat du čájáhusbáikkis, muhto dáidda mii čájehuvvo dáppe leage hirbmat fiinnis. Nu logai stáhtačálli Randi Øverland go Sámiid Vuorká-dávviriid dáiddakonserváhtor Irene Snarby otne ofelasttii su vuorkádávviriin.

Ofelastinmátki dálá sámi dáiddamuseas leage juoga mainna olmmoš gearggiha oalle jođánit. Dávvirvuorkás lea okta unna lanjaš gos dálááigge dáidagat čájehuvvojit. Dasto lea kealláris vel ain unnit latnja gos dáidagat vurkkoduvvojit. 

Dohkketmeahtton dilli

 

Liv Østmo
Foto: Dan Robert Larsen / NRK

Otne geigii Sámiid Vuorká-dávviriid stivra ođđa plána stáhtačállái ja stivrrajođiheaddji Liv Østmo lohká dása stuorra dárbbu. - Min musea han lea áidna musea mii bargá sámi dáidagiin. Dat mearkkaša ahte mishan lea našonála ovddasvástádus. SVD galgá sihke čalmmustahttit sámi dáidaga, gaskkustit dan ja dutkat. Juohke álbmogis han galgá leat dakkár ásahus mii goziha diekkár beliid, deattuha Liv Østmo.

Stivrrajođiheaddji ii loga sámi dáidagis dán áigái makkárge buori dili. - Mii leat justa váccašan ja geahččan gos lea sadji čájehit sámi dáidaga ja gos lea sadji vurket dan. Ii leat nu váttis oaidnit, ahte dáppe lea gárži ja dán dili ii sáhte boahttevaš sámi servodat oppa dohkkehitge, dieđiha Østmo.

Mearriduvvo bušeahttabarggus

 

Stáhtačálli Sámiid Vuorká-dávviriin.
Foto: Dan Robert Larsen / NRK

Stáhtačálli Øverland mieđiha ahte sámi dáidda sihke čájehuvvo ja vurkkoduvvo gáržasis, muhto dát ii leat su mielas makkárge erenoamáš dilli. - Náhan lea miehtá Norgga ja danne lea ráđđehus bidjan plánaid mo galggašii hukset eambbo dávvirvuorkái, čilge Øverland.

Stáhtačálli lohká Sámiid Vuorká-Dávviriid bargan buori barggu ja ráhkadan buori plána dasa mo boahttevaš sámi dáiddamusea galggašii leat. Dát plánat han maid leat ovdal máinnašuvvon stáhtabušeahtas vejolaš boahttevaš huksenprošeaktan. - Ásahus mii bargá vuorkáid-, girjerádjosiid ja dávvirvuorkáid ovdánahttimiin, ABM-utvikling, lea maid geahččan plánaid. Ja doppe de leat ráhkadan ođastuvvon ruhtaohcamuša, mii ii leat vel joavdan departementii, čilge Øverland. Danne son ii loga vel iežas sáhttit dál dadjat maidige dán ohcamuša hárrái. Diet čielga easkka dallego bušeahtain bargagohtet, muittuha stáhtačálli.

Gula jearahallama