Hopp til innhold

Áiggošedje dahkat Romssa buoret kulturgávpogin sápmelaččaide

Olbmuin geat serve duorastaga sámi kulturgulahallamii Romssa ráđđeviesus váillahit buohkat dan seammá: sierra deaivvadanbáikki sámiide.

Kulturdialog om samisk språk og kultur i Tromsø

STUORRA BEROŠTUPMI: Sullii 20 olbmo bohte duorastaga gulahallančoahkkimii, mii dollui Romssa ráđđeviesus kantiinnás. Oasseváldiin lei stuorra beroštupmi fáddái.

Foto: Dan Robert Larsen / NRK

– Mu mielas Romssas leat hui buorit kulturfálaldagat. Mii geat lágidit doaluid váillahat báikki gos sáhtášeimmet lágidit dáid doaluid, dadjá Anne Ragnhild Porsanger. Son lea jođiheaddji Sámi Studeanttaidsearvvis Davvi-Norggas (SSDN).

Romssa suohkan lea ráhkadeamen ođđa kulturplána. Dan oktavuođas háliidit diehtit makkár sámi giella- ja kulturáššiid berrejit vuoruhit čuovvovaš čieža jagi, 2024-2031.

Anne Ragnhild Porsanger

VUORDÁMUŠAT: Anne Ragnhild Porsanger sávvá, ahte Romssa sápmelaččat fargga oaččošedje iežaset deaivvadanbáikki.

Foto: Dan Robert Larsen / NRK

Dan oktavuođas lágidit logi álbmotčoahkkima gos dáhttot gullat maid berrejit vuoruhit iešguđetge kultursurggiin.

Vuosttaš čoahkkin lei Romssa ráđđeviesus duorastaga. Sullii 20 olbmo serve duorastaga gulahallamii, man Romssa suohkan doalai ovttas Romssa sámi viessu oasusservviin.

– Mii fertet lágidit studeantadoaluin juhkanbáikkiin danne go eai leat eará molssaeavttut. Váttisvuohta dainna lea, ahte doppe lea ahkerádjá. Dasa lassin leat soapmásat geat eai háliidivčče dákkár báikkiide, čilge Porsanger.

Les også Romssa sámi viessu virggálaččat ásahuvvon

Gunnar Wilhelmsen, stiftelse av Samisk Hus Tromsø AS

– Romssa sámi viessu boađi boađi

Romssa sámi viesu stivrrajođiheaddjis leat buorit dieđut daidda geat vuorddašit sámi viesu.

– Mii doaivut, ahte mis lea sámi viessu Romssas dán jagi mielde. Dát lea mohkkás bargu. Mis eai leat vel makkárge stuorra ođđasat muitalit, muitala stivrrajođiheaddji Torjer Olsen.

Torjer Olsen

MOHKKÁS BARGU: Romssa sámi viesu oasussearvvi stivrrajođiheaddji, Torjer Olsen, ohcá ain heivvolaš báikki sámi vissui.

Foto: Dan Robert Larsen / NRK

Mii dál lea stuorámus čuolbma?

– Dál lea sáhka sihke ekonomiijas ja das ahte gávdnat viesu mii heivešii máŋggalágán dárbbuide. Dalle leat olu áššit maid ferte váldit vuhtii oktanaga, čilge Olsen.

Stivra lea dál geahčadeamen muhtin molssaeavttuid.

– Eat leat eisege vel joavdan nu guhkás, ahte livččiimet gergosat gosage fárret, deattuha Olsen.

Vuordá máŋga buori árvalusa

Kulturhoavda, Pål Jentoft Johnsen, lea duhtavaš duorastaga gulahallančoahkkimiin.

– Midjiide lea mávssolaš oažžut olu buori árvalusaid. Mii dárbbašat buori ja ođasmahtti árvalusaid, maid sáhttit geavahit iežamet ođđa kulturplánas. Seammás lea mávssolaš deaivvadit iešguđet olbmuiguin geat barget kultuvrrain dahje beroštit kultuvrras, lohká Jentoft Johnsen.

Pål Jentoft Johnsen

MÁVSSOLAŠ ČOAHKKIN: Kulturhoavda Pål Jentoft Johnsen lea duhtavaš vuosttaš gulahallančoahkkimiin.

Foto: Dan Robert Larsen / NRK

Kulturhoavda muitala, ahte olbmot sáhttet ovddidit árvalusaideaset gitta masá dassáigo kulturplána lea gárvvis.

– Ovttaskas olbmot ja searvvit sáhttet čállit gulaskuddancealkámušaid dahje ovddidit oaiviliiddiset Romssa suohkana neahttasiiddu bokte, čilge Jentoft Johnsen.

Studeantasearvvi jođiheaddjis ja sámi viesu stivrrajođiheaddjis leat maid jurdagat mo sámi giela ja kultuvrra dilli galggašii leat..

– Sávašin ahte gielda fargga searvvašii sámegiela hálddašanguvlui. Dalle boađášii sámegiella eambbo oidnosii dáppe Romssas, sávvá Anne Ragnhild Porsanger.

– Mu boahtteáiggesávaldat lea, ahte šattašii dušše fiinnis, suohtas ja čáffat leat sápmelaš dáppe Romssas. Dat lea mu sávaldat boahtteáigai, lohká Torjer Olsen.

Korte nyheter