– Dál lea fiidnámus áigi. Leat fierttut ja guolli maid doppe álkkibut vuggii, lohká Deanu sátnejođiheaddji Frank Ingilæ.
Su suohkan lea juo sádden fylkkamánnii ohcamuša beassat skutermáđiid doallat guhkit rabasin.
Fylkkamánni lea bivdán ohcamušaid sáddet sidjiide ovdal cuoŋománu 28 beaivvi.
Heivehit siivvu mielde
– Mii álgit meannudit ohcamušaid go skutervuodjináigodat nohkágoahtá. Danne lea buoremus jus ohcamušat leat ollen midjiide ovdal 28. beaivve dán mánu. Vaikko dál lea ain olu muohta, sáhttet bivvalis dálkkit jođánit suddadit muohttaga.
Suohkanat fertejit dárkilit čuovvut áigemeari, go Fylkkamánni ii meannut ohcamušaid mat bohtet beare maŋŋit.
– Suohkanat fertejit ieža čielggadan movt boazodollui heive rabasin atnit skutermáđiid, ovdal go sáddejit midjiide ohcamuša. Lahtut eai ábut šaddat vahágin earáide geat dárbbašit guovlluid.
Gulahallan boazodoaluin
Unjárgga, Poršáŋggu ja Deanu gielddat leat juo ohcan guhkidit skutervuodjináiggi. Dát gielddat bivdet rabas lahtuid vel hellodatbasiide, ja leat ohcan guhkidit áiggi miessemánu 12. ja 14. beaivve rádjai.
Kárášjoga gielddas leat dál čállime ohcamuša. Guovdageainnus ja Álttás eai sáhttán vel vástidit guđiid lahtuide ohcet guhkit skutervuodjinlobi.
Deanu gielda lea gulahallan boazodolliiguin geat leat skutermáđiid lahka. Orohat 9 lea dohkkehan guhkideame. Orohat 13 lea ges johtán eret muhtin guovlluin go skuterjohtolat muosehuhttii ealu.
– Deanu gielda ii oainne dárbbašlažžan eambbo gulahallat boazodoaluin, čállá gielda ohcamušas.
