NRK Meny
Normal

Åhtså ådå jådediddjev

– Ij la mahkkárak tjierggisvuohta mij guosská ådå virge almodimev direktørran, tjårggi Árrana stivrrajådediddje.

Árran

Dát sáme intstitusjåvnnå gæhttjal dal jådediddjev gávnnat gidá rájes.

Foto: Simon Piera Paulsen / NRK

Julevsáme guovdásj Árran Divtasvuonan almot dal jådediddjevirgev.

Stivrrajådediddje Andreas Mikkelsen sihtá rádjánis prosessav dán virggealmodime birra.

Árrana ådå stivrrajådediddje Andreas Mikkelsen

Stivrrajådediddje Andreas Mikkelsen åhtså dal ådå bæjválasj jådediddjev julevsáme guovdátjij.

Foto: Sander Andersen / NRK

– Árran sihtá rabásvuodav ja rádjánisvuodav mij guosská virggáj. Danen dav almodip.

Moarmesmano vuostasj biejve la guhtta jage dallutjis gå julevsáme guovdasj oattjoj ådå direktørav.

– Virgge l gudá jahkásasj gávddavirgge, ja da la dan diehti dav almodip, javllá stivrrajådediddje Andreas Mikkelsen ja dættot ij la mahkkarak tjierggisvuohta gå virgev vat almodi.

Virgen ij tjuovo mahkkárak riektá joarkket.

Lars Andreassen, direktør Árran

Le gal iehpesihkarvuohta jus udnásj direktørra Lars Andreassen vat direktøravirggáj åhtså.

Foto: Sander Andersen / NRK

Stuojmme

Vásse bále gå Árran direktøravirgev almodij, sjattaj stuojmme gå dallusj direktørra Filip Mikkelsena mielas stivrra ittjij virggealmodimprosessav nav buoragit dåmada.

Filip Mikkelsen

Árabut direktørra Filip Mikkelsen.

Foto: Simon Piera Paulsen / NRK

Mikkelsen lij má dalloj akta åhttsijs direktøravirggáj, valla dallusj stivrra de farra fálaj udnasj direktørraj, Lars Anderassenij, dav virgev.

Filip Mikkelsen lij Árrana vuostasj direktørra, ja lij virgen lågenan gietjav jage.

Vásse bále gå Árran åtsåj direktørav lidjin gålmmå åhttse virggáj.

Ådå direktørra virggáj biejaduvvá bårggemáno vuostasj biejve rájes.