Agnete Saba: – Doaivumis mu muitalus lea veahkkin earáide

• Les på norsk: Agnete Saba: – Håper min historie kan være til hjelp for andre

– Agnete muitalus lea okta daid muitalusain mun duođaid lean vuordán gullat. Sus han lea nu olu muitalit vaikko lea nu nuorra, lohká Stian «Staysman» Thorbjørnsen TV-prográmmas.

Čieža beakkálmasa Norggas leat dás mielde, ja daid gaskkas maid unjárgalaš Agnete Saba. Áibbas nuorran šattai sámi nieida beakkán miehtá davviriikkaid.

«Oru jaska beana» šuoŋain vuittii The Blacksheeps joavku sihke norgga MGPjr, ja dan davviriikalaš gilvvu 2008:is.

Go ná nuorran álggii artistan, de lea Thorbjørnsen mielas erenoamáš gelddolaš gullat Saba vásáhusaid.

– Agnete han lea stuorra taleanta. Buot maid dahká orru áibbas lunddolaš, vaikko mun dieđán ahte lea bargan garrasit, muitala «Staysman» NRK:ii.

Bekkii nu fáhkka

Ovddeš Eurovision-gilvvu vuoiti, Hanne Krogh, lea maid čuvvon Agnete artistaeallima.

– Son lea nu rocka ja čaffat. Mus lea váimmustan sierra sadji sutnje, muitala Krogh TV-prográmmas.

«Hver gang vi møtes» prográmmas beassá nuorra finnmárkulaš muitalit lossa áššiid birra oadjebas dilis.

Movt lei nuorran šaddat beakkálmas, ja movt son ražai daid olu vuordámušaid geažil.

– Fuomášupmi maid sukseassa buvttii lea lossa noađđi mánnái. Erenoamážit munnje, gii lean oalle sensitiiva olmmoš, muitala Saba prográmmas.

Maŋŋel «Oru jaska beana» oaččui Agnete hui olu vejolašvuođaid ja fálaldagaid. Vaikko gaskkohagaid vásihii daid heajos beliid das ahte šaddaŧ dákkár beakkálmas, de čájehii ahte nákcii dustet daid hástalusaid maid oaččui.

Son nevttii Hålogaland teáhteris, vuittii «Skal vi danse» dánsungilvvu, bođii nubbin «Stjernekámp» lávlungilvvus, ja vuittii Norgga Melodi Grand Prix 2016:is.

Muhto de fáhkka jávkkai buot lávddiin.

Agnete ii šat beaggán Norgga almmolašvuođas.

• Loga maid dárogillii: Agnete Saba gjør comeback – sier farvel til sykdom og mørke – NRK Sápmi - samiske nyheter, kultur og underholdning

Issoras leat rabas

Son ii čiegat ahte lea leamaš veahá issoras čohkkát beavddegeažis «Hver gang vi møtes»- TV prográmmas, ja muitalit persovnnalaš vásáhusaid.

– Mun juogán dán muitalusa čeahpes ja buorre olbmuiguin. Dat dovdu hui buorre lihkká, muitala son.

Agnete muittuha maid iežas man dehálaš rabasvuohta lea. Go earát ge čájehit rabasvuođa, de dovdá ahte ii raža okto.

– Doaivumis earát sáhttet seamma dovddu oažžut mus. Lea veahá veahkkin rahčat ovttas earáiguin.

Movt duinna manná dál?

– Muinna manná hui bures dál. Mus leat ain hástalusat, muhto mun lean čeahpit gieđahallat daid árgabeaivvis, lohká son.

• Loga maid dárogillii: Maria Mena: – En ære å bli hyllet på samisk – NRK Sápmi - samiske nyheter, kultur og underholdning

Ođđa musihkka

Sabas lea leamaš guhkes boddu artistaeallimis. Dál lea son fas lávken almmolašvuhtii.

Dan dagai «Beginning of the End» šuoŋain, mii álmmuhuvvui ovdal juovllaid.

Dál lea fas álmmuhan ođđa šuoŋa, «Boo».

– Mun ain ráhkadan musihkka mii lea lunddolaš munnje. Mus lea jáhkku dasa ahte boađán geavahit sámegiela ja luođi iežan musihkas. Mu identitehta lea álo mielde go ráhkadan šuoŋaid, muitala son NRK:ii.

«Staysman» lea maid lihkolaš go Agnete lea bargagoahtán fas musihkain.

– Lea buorre oaidnit ahte son aisttan čohkkeda fas heastta ala, go lea leamaš nu guhkká eret almmolašvuođas, muitala NRK:ii.

• «Hver gang vi møtes» TV-prográmma 9. oassi, mas Agnete Saba lea guovddážis, čájejuvvo TV2 kánalas eahkedis lávvordaga 13.02.2021.