– Dát ij la buorre julevsámegiellaj, javllá Ingegerd Vannar, Sáme giellaguovdátjin, Jåhkåmåhken.
Ubbmem universitæhtta fállá åhpadusáv iednegielåhpadiddjijda.
Dát la joarkkaåhpadus åhpadiddjijda gudi juo barggi åhpadiddjen, valla åhpadusá baktu máhtti sij tjadádit åhpadusáv sjaddat iednegielåhpadiddjen.
Åhpadus vihpá gålmmå jage, valla ælla aktak studentajs válljim julevsámegielav oajvvetiebmán.
Ingela Valfridsson Ubbmem universitehtan ij diede manen julevsáme ælla åhtsåm dán åhpadussaj.
Julevsámegiela åhpadiddjijs binná
Sáme giellaguovdátjin, Jåhkåmåhken li ælvvám gássjelisvuodajt gávnnat åhpadiddjijt gudi julevsámegielan máhtti åhpadit.
– Dat ij la buorre julevsámegiellaj gå ij gávnnu soames gut hálijt vádtset dáv åhpadusáv.
– Álu hæhttuji æjgáda iednegielåhpadiddjen doajmmat. Mij ham lulujma sihtat åhpadiddjijt gejn la åhpadiddjeåhpadus ja sámegiella vaj mij oadtjop dav gielalasj progregresjåvnåv majt mij dárbahip Svierigin, javllá Vannar.