NRK Meny
Normal

Dållåæjvvalibme tsahkkidij tjuonamav

Gåjkkebierggo ja káfastallam dållågátten båvtij ságastallammielav ja oassálaste guorrasin joarkket ságastallamij. Sámedigge ja Nuortta-Sálto suohkana galggi vas æjvvalit.

Bålmøte i Tysfjord

Dållåæjvvalibme Divtasvuonan. Hábmera suohkanoajvve Rolf Steffensen (g.b), Stájgo suohkanoajvve, Asle Schrøder, Sámedikke rádeájras Ann-Mari Thomassen, duodden Árran-direktørra Lars Andreassen, Sámedikke rádeájras Henrik Olsen ja Divtasvuona suohkanoajvve Tor Asgeir Johansen.

Foto: Harrieth Aira / NRK

– Dákkir tjåhkanimvuohke ham vaddá máhttelisvuodav ráfesláhkáj tjåhkudallat ja ságastallat aktisasj ássjij birra ja navti ham aj luohtádusáv tsieggip nubbe nubbáj ja mij la viehka ájnas, javllá Divtasvuona suohkanoajvve Tor Asgeir Johansen NRK:aj.

Mánnodagá æjvvalin Stájgo, Hábmera ja Divtasvuonan suohkanoajve ja sámedikkerádeájrrasa dållåtjåhkanibmáj Ájluovtan, Divtasvuonan.

Árran – julevsáme guovdátja direktørra lij sijájt tjåhkanibmáj bivddim låvdagoahtáj Árrana ålgusjbielen dålå birra ságastalátjit ájnas ja aktisasj ássjij birra ma guosski divna dájda gålmmå suohkanijda.

Divtasvuona suohkanoajve mielas le æjvvalibme tsieggim buorep luohtádusáv sijáj gaskan.

– Ávon lev gå máhtijma æjvvalit dán láhkáj, javllá sån.

– Buorre vuojgge

Hábmera suohkanoajvve, Rolf Steffensen lij aj dudálasj maŋŋel tjåhkanime.

– Dát lij buorre ságastallam gånnå lij buorre ja luohtedahtes vuojgge, ulmme lij ságastallat ja mij lip guorrasam joarkket ságastallamij, subtsas sån.

Bålmøte i Tysfjord

Árran-direktørra Lars Andreassen, Sámedikke rádeájras Henrik Olsen ja Divtasvuona suohkanoajvve Tor Asgeir Johansen.

Foto: Sander Andersen / NRK

Hiebadahtedum varresvuodadievnastusá sámijda Nuortta-Sálton sjaddá sierra ássjen gå STH-nammadus boahtte bále tjåhkan. STH-nammadus la Stájgo, Divtasvuona-, ja Hábmera suohkanij aktisasjbarggonammadus, ja boahtte tjåhkanibmáj galggá aj Sámedikkeráde oassálasstet.

– Muv mielas manáj viehka buoragit ja lij fijna ja buorre ságastallam ja mij lip ságastallam moadda ássjij birra ma guosski sámijda ja iehtjádijda dán guovlon, javllá sámedikkerádeájras Ann-Mari Thomassen gut ittjij dal balá jus ga suv gáppte suovvahapsav oadtju.

– Dálla l miján aktisasj dádjadus gåktu giehtadallat dájt ássjijt boahtte ájgen, dættot sån.

Sámedikkeráde nubbe ájras Henrik Olsen dættodij Sámediggáj lej ájnas oassálasstet dán dållåtjåhkanibmáj.

– Dát guovllo l midjij ájnas sáme guovllo, ja dan diehti l buorre gå Árran la mijájt divnajt dán láhkáj aktij tjåhkanaddám. Mån jáhkáv dákkir iehpeformálalasj tjåhkanime máhtti joarkket ienep formálalasj tjåhkanimijda gånnå tjielgga mærrádusá dagáduvvi, javllá sån.

Soames suohkana juo usjudallagåhti aktisasjsjiehtadusájt Sámedikkijn dahkat.

– Njálga biebbmo

Stájgo suohkanoajvve Asle Schrøder rámpoj biebmojt majt oattjoj:

– Ihkeva njálga gåjkkebierggo, dat la ham hærskobiebbmo, tjajmaj sån.

Sån javllá ij la dal Stájggo dán guovlo tjielggasamos sámesuohkan.

– Valla mijá suohkanin årru sáme, ja ihkap la dal muddo buorebut sijájt vuojnnusij oadtjot. Iv dal jáhte jur sáme galbajt tsieggigoahtet jur dalága, valla ihkap la aj dat ássje man birra aj mij Stájgon bierrip ságastallat, dættodij sån.

Ja sån guhti lij oadtjom dájt politihkkárijt aktan tjåhkanittjat, Árrana – julevsáme guovdátja direktørra Lars Andreassen, lij aj riek dudálasj tjåhkanimijn.

– Ulmme li ham aktan ságastallat vaj luohtádusáv tsieggit, ja dajna mij vuorbástuvájma.

– Suohkana ham galggi Sámedikkev sierra tjåhkanibmáj bivddit gånnå varresvuodadievnastusá sámijda la guovdátjin, ja mån lav riek dudálasj gå sij li guorrasam vas æjvvalit, javllá Andreassen.