NRK Meny
Normal

Adveantakalender 18.12.

Dán jagáš kalendera lea Beate Heide buvttadan NRK Sápmái.

Juovlaselskáhppi
Foto: Beate Heide

Álo lei veahkajuovlaselskáhppi juovlaáiggi. Mis ii lean astu ja dilli gávnnadit muđui jagis muođaiguin, siesáiguin ja iežá hulkkiiguin riemuidoktavuođain. Juovlaáiggi lei dasa dilli ja vejolašvuohta.

Go lei dan mađe hárvenaš dáhpádus, de mon vuorddašemiiguin vurden dan beaivvi go mii galggaimet juovlaselskáhppii. Lávii álgit maŋŋegaskabeaivvi, ja lei ovttilis nu ahkit vuordit ahte ollesolbmot galge geargat gaskabeaivesebbáriin ja čiŋadišgoahtit.

Mis ii lean dalle biila. Dan dihte min vertiimet vázzit dege mátkkoštit bussiin go vulggiimet selskáhppii. Jos vácciimet, lei hearvái go lei spárkensiivu, vai beasaimet mannat ovtta šuvain, gaittin mánát spárkka nalde ja áhčči stivrejeaddjin. Hui go de hurgguhii. Mon, guhtes ledjen nieida, atnen fiinahossobuvssaid, ja de olgguldasbuvssaid vai bivalin. Ja skuovat ledje mielde lávkkas. Smávvaskuovat.

Lei imášlaš oaidnit muođaid, čeziid, siesáid, ednuid jna čiŋaduvvon, ja bargguid gehtte gieđaidgaskkan. Amašin beláid čikŋabiktasiiguin ja čáhcegálgojuvvon vuovttaiguin. Veahá gaskka mii leimmet visot dego apmasat nubbi nubbái.

Álohii lei láhččojuvvon hearvás beavdi, ja vel hearváseabbo lei ahte mii mánát oaččuimet bruvssa.

Go čoavji lei dievvan herskkuiguin, ja mii leimmet váibán guldaleamis váksenolbmuid hoaladeami, de mii láviimet geahččat beláid juovlaattáldagaid, ja de mii spealaimet spealaid. Mii láviimet leahkit guhkes áiggi selskáhpis, ja dábáleamos nu guhkes áiggi ahte eahkesborramuš guossuhuvvui ovdal mii vuolgilišgođiimet ruovttobálgáid mielde.

Muhtomin juovlaselskáhppi lei min luhtte. Vel dalle ge lei seammá gealdu. Min huotnahis lei šlámbbargeallir. Bohtos lei ovttilis ahte doppe vuollin mii stoagaimet čiehkat ja ohcat, ja máhcaimet ruoktot ráigánan hossobuvssaiguin ja heavdnevierpmit vuovttain, go leimmet čiehkadan siskkimus čiegaide.

Iluin muittán daid selskáhpiid. Lei duohta dáhpádus ja juoga vuordinveara. Mon sávan ahte mu mánát nai oččole diekkár buriid muittuid mánnávuođa juovlariemuin. Lea allaárvosaš deatta eallingeainnu mielde fievrridit.