NRK Meny
Normal

Adveantakaleandar: Vuosttáš juovllat amas riikkas

Dán jagi adveantakalendera lea Beate Heide buvttadan NRK Sápmái.

først jul i et fremmed land
Foto: Beate Heide

Adveantakaleandar: 17.12.2014

Mu juovlamuoras heaŋgu stovllaš man nalde lea girjelána. Girjjiid nalde lea eahppel, ja nuppi girjesealggis lea čállon oahpaheaddji. Dát lea váibmoláhka juovlamuitu maid mon ožžon attáldahkan USAas máŋga jagi dás ovdal, jur measta olbmoagi áiggi. Lei dat jagi go gergen oahpaheaddjiskovllás ahte attáldat bođii, muhto dan duogáš lei ustitvuohta midjas álggii go mon gávccinuppelotjahkásažžan ledjen lonuhanstudeantan Iowan. Doppe galgen orrut muhtin veagas, ja eallit amerihkálaš nuppelotjahkásažžan ovtta skovlajagi.

Mon bohten unna gávpogažžii duhát ássiiguin ja 5 girkuiguin gasku biibbalavi. Doppe ledje olbmot juohke sajiin Eurohpás geat ledje ássán dohko gávccinuppelotlogus. Sis ledje nana čanastagat ruovtturiikkaide vaikko ledje juo vássán mealgat áiggi, golbma njeallje buolva, dan rájes go fárreje.

Beate Heide

Dán jagi adveantakalendera lea Beate Heide buvttadan NRK Sápmái.

Foto: Privat

Doppe gasku bánnogáhkkoeatnamis gárten ustibin muhtumiin gii lei máŋga logi jagi mus boarrásut. Ustitvuohta ii jeara agi, dainna letne ovttaoaivilis. Vuosttas juovllaid siidda olgobealis de amašin máŋga vieruid, muhto Muriela olis lei buorre dobdu. Lei imašlaš ávvudit juovllaid iežan veaga gehtte, ja daid oahpes vieruid ja dábiid gehtte. Muhtun ládje lei gelddolaš nai. Mon elven juoga ođđasa ja iežálágana, ja borren vuosttáš geardde kalkuna. Lei buorre vásáhus.

Áibbas gitta Muriel jámii, de reivvet manne dávjá Armstronga ja mu gaskal, ja akta dain ráhkkáseamos muittuin sus, lea juovlahearvva maid ožžon dalle go ledjen ollen mihttomearrái; váldán loahpageahččaleami ja šaddan oahpaheaddjin. Mon geahčan dasa ráhkisvuođain juohke jagi, ja dat lea muitun munnje man hearki eallin lea, ja ahte mon verten muitut muitalit ustibiiddásan man dehálaččat sii leat munnje.