Bidjat juovlamuorajuolggi murrii lea juoga man in hálddaš nu hirbmat bures.
Jagiid mielde lean geahččalan iešguđetge juovlamuorrajulggiid, muhto dat mii dáin lea oktasaš lea ahte dárbbašuvvojit guovttis dan bidjat, nubbi ferte doallat muora njuolga ja nubbi ferte botnjat skruvaid máddagii. Lea dagahan iešguđetge hástalusaid.
Muorra sáhttá maid mielddisbuktit máŋgga lágan doaimmaid. Sáhttá leat menddo gassa máddu, nu ahte ferte čohkat dan ovdal oba sáhttá ge coggat juolggi sisa. Sáhttá leat olles prošeakta dat, ja dat ádjána go olbmos rievtti mielde leat duhát eará ášši jurdagiin.
Dán jagáš muorra lei dasa lassin hui čáppat. Unni ja ruoná oavssit lávgadin máddagis gierragii. Čullojuvvon dáppe láhkosis ja njulgestaga guoibmás oahpis mii lea čuvvon mielde ruoktut.
Dán jagi galggai muorra biddjot juolgái áiggil juovlaruohta, dan ledjen mearridan.
Juovlamuorajuolgi lei gárvásit kámmáris, ja ledjen sihke gávdnan dan, ja ohcan dan oidnosii.
Fuomášin ahte váilo moadde plastihkkabihttá guovtti skruvas dain golmma skruvas mat gullet juovlamuorrajuolgái, muhto nu optimistálaš go lean, de smihtten najojo, sihkkarit manná bures dán jagi maid, - ja de bijaime juolggi gitta.
Lei veahá skivžžas, čuččodii gaskafeaskáris giera robis ja vuorddašii láhttiid bassot. Go dat lei dahkkon, ja muorra loktejuvvui várrogasat sisa stohpui, de dat lei vitnjut ja mieiggadii seainni vuostá. Áddejin ahte dál lei dárbu ođđa juovlamuorrajuolgái.
Lean máŋga jagi sávvan juovlamuorrajuolggi mii njamista iežas gitta juovlamuora máddagii, muhto dakkár ii leat vissá vel hutkojuvvon. Baicce lea boahtán juovlamuorrajuolgi mas leat stállestráŋggat maid galgá jehkket sadjái.
Dakkára de smihtten oastit, ja maŋŋá go ledjen máŋgga almmáiolbmobuvddas fitnat de bohten rámis ruoktut juovlamuorrajulggiin mii galggai vástidit mu nieguide.
Čájehuvvui ahte lei biika guovdu juovlamuorrajuolggi, ja juovlamuora guovddáš galggai deaivat justa dan biikka.
Dasa lassin fertii muorra leat váhteris.
Nappo áibbas váhteris, ja ii váhteris ja vel veahá! Eai mannan galle sekundda, de leimme moai bártniin nannosit gidden muora juovlamuorrajuolgái. Nu álkit ii leat goassige ovdal mannan.
Oaččut jáhkkit mun lean ilus - ja lean movttegis juovlamuorrajuolggi eaiggát. Dakkár mii dagaha ahte in dárbbaš ovddalgihtii moraštit mo galggan nagodit juovlamuora bidjat juolgái boahttevaš juovllaid.