Dál de lean dan ge vásihan. Lean čoaggán hásselnihtiid. Lei duođaid fiinnis. Dál lean mun ge leamaš niehttemeahcis, jurddaš.
Lei oainnát nu ahte ledjen Moldes, ja doppe muitalii Edel ahte son lei fitnan čoaggimin nihtiid. Son ferte leat vuohttán áibbašeami mu ámadeajus, go son lei jođán dadjat ahte mii áinnas sáhtiimet mannat niehttemeahcis finadit. Son diđii gos lei.
Sánis dahkkui ii lean guhkki. Ovdal go háhppehin oba jurdilit ge, de čuoččuimet hásselniehtteskirriid luhtte. Edel lei váldán áhčis soappi mielde, ja dainna son sojahii ovssiid vulos.
Vuos fertii diehttelasat čájehit munnje mo hásselniehttegihppu lei oaidnit muoras, ja dadjat jo čujuhit dan munnje vai oidnen daid. Lei nu somá faŋuhallat nihtiid!
Ja fáhkka mus ledjet lupmat dievvan. Niehttečoaggináigi lei nohkagoahtimin, muhto mun gullen mo niehtit skilaidedje niehttegaraid siste.
Lei gelddolaš cuovkut nihtiid maid ieš ledjen čoaggán, ja ávvu borrat áiddo láddan hásselnihtiid. Edel muitalii ahte son oktii lei rádjan olles gore dievva nihtiid loktii, muhto go manai viežžat nihtiid, de dat ledje jávkan!
Sáhpánat ledje gávdnan su vuorkká, ja ledje herskostallan. Dan maŋŋá borragođii Edel nihtiid čavčča mielde, go leat buoremusat. Son maiddá muittuhii mo mii láviimet speallat filipine juovllain.
Don muittát dan? Go ovtta niehttegaras ledje guokte niehti, de šiehtadeidde vuoittu. Ja boahtte háve go dat guovttis geat leigga juogadan ovtta filipine deaivvadeigga, de galggai muitit dadjat "filipine" vuosttažin, ja de vuittii.