NRK Meny
Normal

Adveantakaleandar 13.12.16: Lucia-konsearta

Dán jagi adveantakalenandara lea Beate Heide buvttadan NRK Sápmái.

Lucia
Foto: Beate Heide

Lucia-konsearta árrat iđđedis lea dáhpi masa mun in leat hárjánan, muhto go oidnen ahte dovddus koara "Cantus" galggai doallat iđitkonseartta Vår Frues girkus beal gávcci áiggi, smihtten ahte dál de áiggun mannat dohko. Lei imaš vuodjit iđitjaskes gávpoga čađa, bissehit biilla ja vázzit girku guvlui. Jaskeslunddot ja iđitváiban olbmot dopme girku guvlui. Áddejin ahte ledje bivnnut doalut go ledje jo máŋgasat vuordimin beassat oastit bileahta.

Gávdnen čohkkánsaji, ja mieiggastin bures. Mánát dopme duohkut deike, lei okta skuvla mii galggai leat mielde konsearttas. Fargga jáddaduvvo čuovggat, ja olbmot heite gáhkumis. Latnjii leavai gealdu - ja fargga gullojedje čuvges mánájienat mat lávlu su birra gii bođii sevdnjes viesuide, dan botta go vázze ovddabeallái girkus. Go buot lávlut ledje deaivan iežaset sajiide, álggii čáppa diibmu mas koara ja mánát lávlu vuoruid mielde.

Joavku gii čuojaha adveantakaleandaris

Dát joavku čuojaha adveantakaleandaris.

Foto: Beate heide

Ledjen hirpmástuvvan go mánát ledje bajil oahppan teavsttaid, ja ahte sii čuvvo dirigeantta čielga lihkastagaid. Gaskkohagaid bohte mánáin gávvasat maid sii geahččaledje bissehit, ja mun áddejin ahte sii dáide leat leamaš gealdagasas ovdal konseartta, ja ahte eai lean oađđán nu bures dan ija. Dasa lassin ledje sii sihkkarit lihkkan árat go lávejedje.

Lei čáppa boddu, boddu jurddašit girkus dán nagir ja sevdnjes juovlamánu iđida. Go konsearta nogai, de čužžo koarralávlut ja juhke varas luciagáhkuid gehččiide, giitosiin "giitu go bohtet", ja govda mojiiguin ja mun dovden ahte dán beaivvis lei buorre álgu. Jo, mun jáhkán mun áiggun lonuhit gokčasa Lucia-konsearttain eanet juovlamánu iđidiid.