Go čohkkedan dihtora ovdii čállit jurdaga dahje dovddu, de ii leat justa nu ahte lea beare čálligoahtit. Máŋgii láhpán dan mii oaivvi siste orui buorre jurdda čállosii, ovdal go joavdá olggos oaivvis, gieđa čađa ja mášiidnii. Dat sánit mat oaivvi siste orru nu jierpmálaččat ja bures daddjojuvvon, orrot dál nu láivvit ja duipasat. Lea dego sihke máihli ja liepma lea golgan eret dain. Lea dego leat massán olles oaivila.
De ii leatgo álgit ođđasit. Geahččališgoahtit bivdit álgojurdaga, jurdaga ja daid sániid maiguin jurdda galgá gárvodit. Dávjá ferte máŋgii geahččalit. Máŋga sáni ovdal jurdda čállojuvvo. Muhtomin govččan jurdaga nu ollu sániid sisa ahte oaivil jávká. Dalle maid ii leatgo álgit ođđasit, ja áinnas eará geahččansajis geahččalan dihte gávdnat áššeguovddáža.
Čállit oanehaččat, čoahkis ja goitge álkit, lea gáibideaddji proseassa. Eanaš čállosiid duohken lea garra bargu. Ii leat nu ahte sánit dušše bohtet munnje, biekka mielde. Dávjá ferten bargat guhká, ja máŋgii bargat dainna seamma čállosiin vai dat galget doaibmat. Ja dat doibmet go lohkki, na don, áddet maid mun oaivvildan; Ahte eai leat dušše áhpin hutkojuvvon sánit báhpára alde oaivila haga.
Čállin lea nappo eanet gillilvuođageahččaleapmi go kreatiiva proseassa.
Mus leat dávjá ollu čállosat dihtoris oktanaga - justa danne go dat dárbbašit áiggi ovdal leat láddan sáddejuvvot máilbmái. Dávjá ferten geahččalit lohkat čállosiid go lean eahpesihkkar leago čálus čoahkis, dahje áddego lohkki maid mun geahččalan muitalit. Čállin lea gierdevašvuođaiskkus. Goitge liikon dasa hui bures. Addá ollu ilu beassat čállit jurdaga gárvves buvttan.
