NRK Meny
Normal

Adveantakaleandar 10.12.16: Soliekeavssat

Dán jagi adveantakalenandara lea Beate Heide buvttadan NRK Sápmái.

Soliekeavssat
Foto: Beate Heide

Makkár borramuša olmmoš čatná juovllaide lea eanaš dan duohken masa lea hárjánan ruovttus. Nella muitalii ahte sin ruovttus álggii álo sin eadni serinagáhkuid gáhkket. Mánnáčora lávii veallát gievkkanbeavddi vuolde, ja dađi mielde go njálgga gáhkut bohte uvnnas olggos ja biddjojedje čoaskut gievkkanbeavddi ala, de geigejuvvo smávva mánágieđažat njálggesmielain válddestit gáhku dalán go eadni jorai sealggi sidjiide. Son lávii dadjat ahte eai ožžon borrat nu ollu, muhto de dahkaluttai ahte ii oaidnán man olu sii cogge njálmmiideaset.

Adveantakaleandar joavku
Foto: Beate Heide

Gáhkožat leat njálgámus go leat áibbas varrasat áiddo uvnnas váldon olggos, muhto lea rádji man ollu smávva čoavjjážat nagodit. Vuosttaš borrama maŋŋá ledje mánát gallánan. Ja dalle eai šat beroštan nu sakka eatni gáhkkemis.

De lávii eadni gáhkkegoahtit daid gáhkuid maiguin ádjánii, dat mat ledje ere erenoamanat juovllaide; Soliekeavssaid. Dáiggi galggai dulbet ja deaddit forpmain keaksan, ja de galge bassojuvvot justa muttát guhká. Go ledje čoskon, de galggai guovtti ja guovtti gaskii bidjat šukuládalávcca. Go mánáid čovjjiin ii lean nu keaksamiella, de bállejedje soliekeavssat leat gáhkkostobes dassá girkobiellut čuojahedje juovllaid álggu. Ja dát keavssat, sihkkaruššá Nella, šaddet beare ere njálgát go besset láddat gáhkkobovssas. Nellai lea dá dat albma juovlagáhku. Daid maid ráhkada muittašan dihte mánnávuođa juovllaid. Lean sihkkar ahte sihke dalle go Nella gáhkke, ja deavdá keavssaid - ja erenoamážit go rahpá stobe mas leat soliekeavssat, jo, de bohtet su muittut mánnávuođa juovllain buot daid hájaiguin ja máisttuiguin mat ledje, ja seammás áibbašeapmi sis geat dan rájes leat vádjolan áiggis eret, muhto gean mii muittašat ráhkisvuođain buot daid áššiid dihte maid sii leat addán midjiide.