NRK Meny
Normal

Adveantakaleandar: Bihpporgáhkkonisu kantiinnas

Dán jagi adveantakalendera lea Beate Heide buvttadan NRK Sápmái.

pepperkakedamer
Foto: Beate Heide

Adveantakaleandar 04.12.16

Bihpporgáhkkonisu kantiinnas

Go adveanta lahkonišgođii ledje kantiinna nissoniin suollemasvuođat. Čužžo njunnálagaid ja snjiezistedje beare olmmoš lahkonii diskka, nu ahte mun áddejin ahte juoga lei boađi boađi. Juoga gelddolaš ja eahpedábálaš. Go njálgámus juovlanjaddehájat leavvagohte gievkkanis, ja stuorra bihpporgáhkkováimmut heŋgejuvvo feaskáriidda, de áddejin ahte juovllat lahkonišgohte, maiddá barggus. Juovlamánu vuosttaš beaivvi go bohten kantiinnai, de heaŋgái bihpporgáhkkonisu mu namain diskka badjel. In lean dušše mun, muhto earát maid ledje ožžon dearvvuođa diskka badjel. Jo, heaŋgájedje ollu bihpporgáhkkonissonat ja -albmát ráidun. Ja kantiidnanissonat ledje alcceset oastán juovlanigágahpiriid ja daid coggan, nu ahte kantiinnas lei albma juovladovdu olles mánu. Dasa lassin cahkkehedje gintalii ovdal mii bođiimet okta nubbi sisa iđđedis káfekohpain jávkadit nahkáriid čalmmiin.

Adveantakaleandar joavku
Foto: Beate Heide

Mu mielas lei hui hávski, ja hui njuorasmahtti go gudniin adnojuvvojin nie árvvus. Iđihii mojiid, ja dovden ahte lei dahkkon beroštumiin. Áddejin ahte sis lei leamaš somá go plánejedje dán unna skeaŋkka, ja ledje gealddus oaidnit mo mii dán válddiimet vuostá. Mojohallen ere govdadit álo go oidnen bihpporgáhkkonissona mas vilges gáhkkočiŋain lei čállon Beate, ja smihtten ahte gal ii dárbbašuvvo olu ovdal olmmoš dovdá ahte earát oidnet ja atnet du árvvus. Giitu nieiddaide kantiinnas, geat dagahedje munnje hui erenoamán juovlamánu. In ge jáhke ahte gáibidii nu ollu, dát unna dahkku, muhto gal dat liggii eanet váimmuid go dušše mu. Beroštupmi soaitit gáibidit veahá áiggi, muhto hárve ollu ruđa. Dan gánnáha smiehtadit, iigo nu?