Adveantakaleandar 01.12.16

Dán jagi adveantakalendera lea Beate Heide buvttadan NRK Sápmái.

Adveantakaleandar
Foto: Beate heide

Ođđasit geavahit adveantakaleandara

Ovtta lágideames mii mis lei adveantakaleandara álmmuheami oktavuođas, lei okta gehččiin gii muitalii muitalusa mii bijai jurdagiid johtui. Juo, mis láve leat bottoš gos geahččit sáhttet muitalit iežaset adveantta ja juovlamuittuid, ja nie oahppat mii ge veahá eanet, maid mii fas muitalit ja musiseret.

Dát muitalus lei adveantakaleandara birra mii lei hábmejuvvon eŋgeliin. Adveantakaleandar lei ráhkaduvvon báhpiris ja lei sihke veahá šovkkodan ja gollan áiggiid mielde.

Luŋkkat ledje gáhčadan ja giddejuvvon fas liibmabáttiin.

Smávva plastihkkafiguvrat mat ledje leamaš luŋkkaid siste ledje jávkan. Juohke nummár luŋkka duohken lei čáppa govva. Adveantakaleandar roggojuvvui bajás juohke jagi, ja heŋgejuvvui seaidnái.

In nagot muitit ahte váillaheimmet maide, dajai son guhte muitalii.

Mii illudeimmet dan ahte juohke beaivvi dal lei okta beaivi unnánat juovllaide ja dan čáppa gova ovddas mii lei luŋkkas.

Beate heide

Adveantakaleandar buvttadeaddjii, Beate Heide

Foto: Beate Heide

Mis lei kaleandar máŋga, máŋga jagi, dajai son, muittašeamen.

Lea sihkkar ahte otná mánát eai oaččo dakkár muittuid boahtteáigái. Áviissain sáhttit lohkkat ahte váhnemat golahit duháhiid mielde ruvnnuid ollašuhttin dihtte mánáid nieguid adveantakaleandariin.

Muhttiin mánát oččot vel máŋga adveantakaleandara, mas nubbi lea nuppi buoret.

Lea go mis nu stuora ruđalaš friddjavuohta ahte billistit iežamet mánáid! Hmm, lea aŋkke jearaldat maid ferte jearrat.

Joavku gii čuojaha adveantakaleandaris
Foto: Beate heide

Mun muittán maiddai ilu go oaččuimet unna plastihkka figuvrra mas lei nállošalbmi bajimusas, masa sáhtiimet árppu šalmmastit. Ja vaikko vel mun dihten ahte loahpas leat mus buot figuvrat mat gullet juovlakrubbái, de lei seammá gelddolaš juohke beaivvi rahppát luŋkka adveantakaleandaris.

Lea sátnevájas mas dadjo, «daga alcces álkes iluid de lea du álki illudit».

Jahkán mun čuovun dien sátnevádjasa.