NRK Meny
Normal

Ådå viddnudak galggá færjov gádodit

Vegforum Nord ja Divtasvuona suohkan aktan åvdåsvásstádusáv válldi ja dajnak ådå viddnudagáv álgadi mij galggá E6-færjov gádodit. – Soajttá viehket, javllá guovllorahtejådediddje.

Tor Ageir Johansen og Stig Kjærvik

Divtasvuona suohkanoajvve, Tor Asgeir Johansen ja Vegforum Nord dåjmadagá jådediddje, Stig Kjærvik sihtaba Divtasvuonafærjov gádodit.

Foto: Simon Piera Paulsen / NRK

– Færjjo Divtasvuonan Nuortta-Vuonav guokta åsijda juohká. Ájnas la råvijt tsieggit vaj dåhkki E6-rahte milta avtatrajágin vuodjet.

Dáv javllá Vegforum Nord dåjmadagá jådediddje, Stig Kjærvik gut Divtasvuona suohkana siegen viddnudagáv álgat mij galggá dáv dilev tjoavddet.

– Viddnudagá ulmme la færjodak E6-rahtev nasjåvnålasj fievrrimpládnaj (nasjonal transportplan, NTP) åhtjadit. Dát pládna vihpá 2018 jages 2027 jahkáj.

Viddnudak galggá dá tjavtja álgaduvvat.

– Bierriji guorrasit

Torbjørn Naimak, regionvegsjef i Statens vegvesen

Stáhta rahteviddnudagá (Statens vegvesen) guovllorahtejådediddje, Torbjørn Naimak jáhkká dákkir viddnudak soajttá viehket.

Foto: Håkon Jacobsen / NRK

Stáhta rahteviddnudagá (Statens vegvesen) guovllorahtejådediddje javllá dákkir viddnudak soajttá viehket.

– Jus Nuortta-Vuonan guorrasi de la viehken. Akti færjodak E6-rahte sjaddá, gatjálvis la farra goassa, tjuottjot Torbjørn Naimak.

Guovllorahtejådediddje ij hilgoda færjodak E6-rahte juo jagen 2018 nasjåvnålasj fievrrimplánan máhttá liehket.

– Gå dájna plánajn barggagoahtep de dåhkki dákkir ássjijt åvddånbuktet. Jagen 2016 mij oajvvadusáv etáhtajda rádjap, ja jagen 2017 nasjåvnålasj fievrrimpládna 2018-2027 mierreduvvá.

Murgosvuonas Bálágij lip rahtev guoradallam, ja færjodak E6-rahte dalloj árvustaláduváj.

– Rahte Hábmera tjadá vuostatjin vuoroduváj, ja dan maŋŋela færjodak rahte Divtasvuona rastá.

Æládus massá

6.700 viddnudagá aktan Vegforum Nordav jådedi. Dåjmadagá jådediddje jáhkká boahtteájgen Nuortta-Vuona industrija vuoroduvvá.

– Ij dåssju guollim ja guolleæládus, valla aj minerála, ulljo, gássa ja mannoæládus.

– Jus duola dagu trailer dievva guolijs færjo diehti hæhttu 12 tijma vuorddet, soajttá moadda milijåvnå kråvnå masseduvvi, javllá Naimak.

Juo álggám

Juska viddnudak ájn ij la ásaduvvam de la barggo juo álggám.

– Sjnjuktjamánon fylkkapolitihkkárij ja Stuoradikkijn tjåhkanijma, ja dágástalájma makkir prosjevta bierriji vuoroduvvat. Færjodak E6-rahte lij avta dajs ássjijs ma Nuortta-Vuona fylkasuohkana sihti, diedet Kjærvik.

Sån tjuottjot gålo li ájmmudahtte.

– Færjodak E6-rahte la moadda gærddo álbep gå færjodak E39, soajttá 7-8 milliárda.