NRK Meny
Normal

Ostet TV-sáddenáiggi eamiálbmogiidda

Oanehis TV-máidnosat galget dál buoridit dan gova maid Australia váldomediat čájehit riikka eamiálbmogiin, aborigiinnain.

Bush TV neahttasiidu
Foto: Bush TV

Artikkelen er flere år gammel.

Australia váldomediain leat riikka eamiálbmogat aborigiinnat juhkkis duonat mat illástit eamigiiddiset ja mánáideaset. Riikka mediagovas ii leat aborigiinnain gávdnji ollus masage.

Oanehis máidnosat

Dál áiggošii buvttadanfitnodat "Bush TV" čájehit áibbas eará gova. Fitnodat ráhkada oanehis TV-máidnosiid mat čájehit positiivvalaš gova eamiálbmogiid servodagain. Dasto oastá fitnodat máinnosáiggi stuorra TV-stášuvnnain. - Váldomediat čájehit dán ágái hui oktageardánis gova aborigiinnain, čilge Bush TV direktora Tom Hearn.

Dušše nuppe guvlui

Hearn muitala ahte Australia mediain lea dušše nuppe guvlui dialoga eamiálbmogiidda. - Álo lea sáhka jugešvuođas, alkoholagažaldagain dahje ruoktoveahkaválddálašvuođas. Ii goassige leat sáhka dain geat dahket erenoamáš buori barggu dahje vuitet bálkkašumiid, čilge Hearn ABC Online neahttasiidui.

Veahkkin aborigiinnaide

Central Queensland University áššedovdi media ja kultuvrralaš oahpus Jeannette Delamoir navdá Bush TV addit aborigiinnaide vejolašvuođa ieža stivret iežaset beaggima mediain. - Dáinna lágiin sii cuvkejit negatiivvalaš oktageardánis (stereotihpalaš) gova. Aborigiinnaide lea mávssolaš čájehit, ahte sii maid máhttet ja sáhttet olahit juoganu servodagas, čilge Delamoir.