Måantan Saemiedigkie jih Fylhkeålma Bådåddjesne gaavnedigan jih Gaske-Nøørjen saemienskovlen bijre rååresjigan. Nordlaanten Fylhkeålma, Kevin Johansen diedtem åtna dah øøhpetimmieaamhtsi gujmie barkedh jih dihte tuhtjie åarjelsaemien gïele øøhpetimmie vihkielommes aamhtese daelie.
– Fylhkeålma tjuara daelie barkedh jih tjaktjese øøhpehtimmie faalenassem åarjelsaemien learohkidie Helgelaantesne buektiehtidh, jih vïenhtebe daam buektiehtibie Johansene jeahta.
Dah lohkedæjjah barkoem dessieh ?
– Ibie ennje daejrieh guktie sjædta! Daate lea politijhkeles aamhtese mejnie Saemiedigkie tjuara barkedh, Johansene bïevnede.
Reeremen uvtelasse, staatenbudsjeedtesne vuesehte reereme edtja 3,3 millj kr spååredh jis Gaske-Nøørjen saemien skovlem steegkieh jih guktie daelie vååjnoe dellie daam skuvlem gïjrese daehpieh.
Saemien skovlem guessiedidh
Daan våhkoen edtja Saemiedigkie åarjelsaemien dajvem guessiedidh. Saemiedigkieraerie, Silje Karine Muotka tuhtjie vihkeles jih jeatjah bïevnesh åadtjodh.
– Dæjstan edtjebe Aarpoertese jih saemienskovlem jih tjïeltem råakedh jih govlebe magkeres tjoeperh jih guktie maehtebe dejtie tjoeperidie bijjiebasse lutjnestidh, mijjien raarastalleme barkose, Muotka jeahta.
Magkeres saemien skuvle vihkielommes
Daelie gååvnese gøøkte åarjel-saemienskuvlh, Åarjel- Saemiej skuvle Snåasesne jih Gaske-Dajven Saemienskovle, Aarpoertesne.
Mejtie datne, reerenassem gihtjeme mannasinie Gaske- Nøørjen saemien skovlem veeljeme steekedh, mejtie Åarjel-saemiej skuvle vihkielåbpoe?
– Daan bijre Maahtoedepartemeentene don våhkan soptsestimh, ij badth magkeres skuvle vihkielommes. Mijjieh tjïelkestehtim maam åvteste vihkeles tjuerieh Saemiedigkene raarastalledh, Muotka bievnede.
Ij leah goh dijjieh åådtjeme, daan bijre staatene raarastalledh?
– Manne leam sijjien barkoem laajhteme, dannasinie Staate lea nåake laakan dam aamhtesem gïetedamme. Eah leah dah kunsultasjovne latjkoem Saemiedigkien jih Maahtoedepartemeenten gaskem dåeriedamme, Muotka jeahta.
Saemiedigkie daelie håhkesje, reerenasse jeatjah- laakan revidert budsjeedten tjirrh nænnoeste.
- Lohkh aaj: