NRK Meny
Normal

Áŋgirat civkit sámegillii

Sámit suomabealde leat áŋgireamos civkit sámegillii twitteris.

Indigenous tweets
Foto: Skjermdump / NRK

Neahttabáiki Indigenous tweets lea nammadan sin geat eanemus civket sámegillii Twitteris. Indigenous tweets-siidu lea čohkken álgoálbmotgielain twittáriid davvisámegiela, anárašgiela, julevsámegiela ja lullisámegiela vuođul.

Oktiibuot leat dássážii gavdnan 24.058 civkkanasa sámegillii, 135 twitter-geavaheaddjis.

Yle Sápmi lea bajimužžan listtus. Sis leat lagabut 70 % civkkanasain sámegillii.

Loga eanet Yle Sámi áššis

Anárlaš áŋgireamos

Anárlaš Post-Ooni Ááimu Neeta, Neeta Inari Jääskö, lea nubbiin listtus.

Sus leat badjelaš 2000 civkkanasa sámegillii ja son lea dastto viššaleamos civkit sámegillii priváhta-olmmožiin.

Neeta Inari Jääskö geavha viššalit giela

Neeta Inari Jääskö geavha viššalit giela.

Foto: Privat

Jääskö, lohká beaivválaččat sámi kultuvrra Giellagas instituhtas Oulu Universitetas ja bargá dasalassiin silbarávdiin. Son civká áiton gillii, nammalassii anárlašgillii.

Dáppe oainnát olles listtu: Indigenous Tweets

Twitteriin olaha miehtá Sámi

Son lea ilus go ná bajás bođii listtui, vaikke ii lean áigumuš gal bajimužžaid searvái boahtit. Jääskö muitala ahte son twittera vuosttažettiin geavaha gulahallangaskaoapmin eará sápmelaččaiguin. Son čállá sihke davvisámegillii ja ánárlašgillii Twitteris.

Twitteriin sahtán gulahallat riikarájiid badjel

Neeta Inari Jääskö

Vaikke suomabealde sámit faskkejedje guokte vuosttaš saji listtus, de gulahalla Neeta miehtá sámi nuoraiguin twittera bokte. Son dadjá ahte Suoma bealde ii leat twitter seamma bivnnut go Norgga bealde Sámi. Su mielas lea twitter buorre reaidu oahpásnuvvat viidát eará sápmelaččaiguin.


Indigenous Tweets vuođđudeaddji válddii duvle oktavuođa Jääsköin ja son lea lea leamaš mielde gavdname sámegielat sániid maid neahttábáiki geavaha dovdandihte sámegielaid. Indigenous Tweets dovdá sihke davvsámegiela, julevsámegiela, lullisámegiela ja anárlašgiela.



Romsalaš Siri K. Gaski lea listtus goalmmádin, ja lujávrilaš Sergey Gavrilov lea njealljádin. Kárášjohkalaš Ánne Márjá Guttorm Graven ges faskkii viđát saji go lea ollu civkán sámegillii.

Stoltenberg maid lea čállán sámegillii


Listtus leat maid beakkálmasat sámástan. Árjjá jođiheaddji ja Gáldu-direktevra Laila Susanne Vars oaččui 14. saji listtus. Sámedikki presideantta Aili Keskitalo ges šattai 43. sadjai ja Norgga ráđđehusa stádačálli Ánte Bals ges lea 45. sajis.


Almmolaš asahusain lea Deanu gielda 7. sajis listtus, ja biibbaslsátni ges 11. sajis. Nrk Sápmi lea šattai 16. sajis ja Sámi allaskuvla 42. sajis.


Norgga ovddeš stádaministtár Jens Stoltenberg lea 121. sajis ja Norgga ruvdnoprinsa-bárra leaba ges 130. sajis.