Áššáiduhtton goddán guokte olbmo

Eadni (37) ja su bárdni (12) leaba gottahallan Girkonjárggas. Dievdu, gii ieš lea garrasit roasmmahuvvan, lea dál áššáiduhtton goddán sutno.

Kirkenes kart
Foto: NRK

Politiijat ožžo dieđu diibmu 04.13 ihkku ahte muhtin ásodagas Girkonjárgga gávpotguovddážis lea riedja. Politiijat manne báikái ja gávdne golbma olbmo garrasit roasmmahuvvan go lei báhčaluvvon.

Báikkis duođaštuvvui ahte okta nissonolmmoš lea jápmán, ja guokte olbmo sáddejuvvuiga buohccevissui. Maŋŋil duođaštuvvui ahte nubbi sutnos, 12 jahkásaš bárdni, lea jápmán.

Gávdnan bissu

Roasmmahuvvon dievdu lea dál sáddejuvvon Davvi-Norgga universitehtabuohccevissui Romsii. Son lea dál áššáiduhtton goddimis. Son ja nissonolmmoš leigga náitalan. Nissonolmmoš lei Thailánddas eret, ja soai bártniin eaba lean norgga stáhtaboargárat. Dál leat geahččaleame oažžut oktavuođa sutno lagamusaiguin.

Politiijat leat gávdnan bissu báikkis maid navdet leat vearjun mainna dát guovttes leaba gottahallan.

Kripos jođus Girkonjárgii

Politiijat barget dál taktihkalaš ja teknihkalaš guorahallamiin ja dutket earret eará ránnjáid, geat dieđihedjege politiijaide ahte lea riedja dán ásodagas.

Kripos lea maid jođus Girkonjárgii veahkehit politiijaid dutkamiiguin.

Politiijat eai loga vuos ákka navdit ahte ásodagas leat leamaš eanet olbmot dalle go báhčaluvvui.

Morten Daae

Finnmárkku politiguovllu Morten Daae

Foto: Máret Eli Buljo / NRK

Ii oktage dán golmma olbmos leat ovdalaččas dovddus olbmot politiijaide. Politiijat eaige dieđe vel maidege das mii lea dáhpáhuvvan, earret go ahte dat leat seamma bearraša olbmot.

– Mii geahččalit gávnnahit mii lea dáhpáhuvvan. Mii leat iskame ásodaga vai gávnnahivččiimet mii doppe lea dáhpáhuvvan, ja leat maid dutkame ránnjáid, muitala Finnmárkku politiguovllu áššáskuhttinjođiheaddji Morten Daae.