Čuovvu váimmu ja nieguid

Ella Marie lea neavttár, lávlu, luonddugáhttejeaddji ja giellaberošteaddji ja olu eará. Sus livččii olu maid áiggošii bargat ja olahit, ja lea buori muddui plánen boahtteáiggi.

Ella Marie lea nuppi jagi Álttá joatkkaskuvlla drámá oahppi. Go geargá oahpuin, de áiggošii bargogoahtit neavttárin ja Beaivváš našunálateáhter livččii sávaldatbargosadji.

– Mun lean stuora beaivvášberošteaddji ja mu mielas lea buot suohttaseamos neavttašit sámegillii dan dihte go sámegillii mun beasan čilget iežan buot čiekŋaleamos dovdduid.

– Láven oažžut dakkár kommentáraid ahte lean hui ollu, olbmot sáhttet suorganit vuohččan go mu deivet go sáhtán leat muhttomin hui inteansa, áiggošin hui olu hupmat ja muitalit... Sáhtán leat veahá ekstrema olmmoš. Boahtte jagi go lean russa dalle leat mu olbmát dadjan ahte munnje heivešii russanamman "hormonElla", muitala Ella Marie Hætta Isaksen boagustettiin.

Loga maid:

Šiellaruđat SGP vuoitái

Gergosat garra vugiiguin vuostálastit ruvkedoaimmaid

Ella Marie váibmoáššit

Ella Marie lea neavttašan teáhterlávddis dan rájes go lei guđajahkásaš, son lea mátkkoštan viidát máilmmis, earret eará go čájehedje "Soapmásat" čájálmasa, máilmmi mánáidteáhterfestiválas. Ella Marie rámida Deanu kulturskuvlla ja lohká ahte eará gielddat galggašedje nai viiddidit kulturfálaldaga mánáide.

Ella Marie čállá lávlagiid sihke eŋgelas-, dáro- ja sámegillii, muhto lohká ahte sámegiella dat movttiidahttá vel ain eambbo čállit.

– Mun fáhkka fuobmájin moadde jagi áigi man fiinnis mu eatnigiella duođai lea ja dan dihte mun láven juohke beaivve viggat viiddidit iežan sátneriggodaga ja álo gávdnat ođđa sániid maid in leat máhttán ovdal, ja go gávnnan dakkár erenoamáš fiinna sániid de álget jurdagat ja lávllateaksta boahtá dan vuođul. Nu ahte mun álohii álggan ovttain sániin go čálligoađán teavstta.

Luondu lea su váimmus

Ella Marie lea guhká áŋgiruššan luonddugáhttenáššiin ja skábmamánus 2014 de šattai Ella Marie mánu "superverver" Luondu ja nuorat -searvvis, ja son válljejuvvui maiddai j Finnmárkku luondu ja nuorat –searvvi jođiheaddjin 2015.

– Go fárrejin Áltái ja oahpásmuvven ođđa olbmuide, de sii fuomášedje ahte mun čoggen buot doabbariid maid gávdnen meahcis ja go leimmet vázzimin. árvaledje ahte berrešin searvat Luondu ja nuorat -searvái. Ja mun jurddašin, OK, lohká Isaksen.

Jus áiggut eambbo oahpásmuvvat Ella Marie Hætta Isakseniin guldal duorastatmagasiinna dii.16.30 NRK Radio - NRK Sápmi - Direkte