NRK Meny
Normal

Šuokŋa-ja nuohttadahkki juoigá

Issát Sámmul Hætta lea dál searvamin Sámi Grand Prixii luđiin. Dál son ieš gorgŋe lávdái, ovdalis lea son earáide čállán lávlagiid oktain šuoŋain.

Issát Sámmul Hætta

Issát Sámmul Hætta

Foto: Anne Olli / NRK

Gula Issát Sámmul Hætta

Issát Sámmul Hætta lea njealjja geardde čállán Sámi Grand Prix gilvui lávlaga, sihke sániid ja šuoŋa lea son de bidjan dáidda. Son lea gal čállán sániid vel ovtta eará lávlagiige, dán lávllui Anja Westerheim 1995.

Čállán olu teavsttaid

Son lea čállán olu teavsttaid muđuige, ja sus lea maid filbmamánus gárvvis, muhto das ii leat vel filbma šaddan. Anáris muitala iežas leamaš čállin oahppus, ja doppe son oahpai čállit filbmamánusiid.

Čállán filbmamánusa

Issát Sámmul Hætta lea ožžon filbmamánusa filbman. "Ulddaid luohtegeađgi", dán lea Mánáid TV sádden guovtti oasis jagi 2002, ja dás lei Issát Sámmul Hætta ieš mielde neavttárin. Sus lea vel eará mánus gárvvis mii ii leat vel šaddan filbman, dán namma lea "Šelges Cola".

Lávlun ja juoigan guhká

Suoŋat ja teavsttat lea geasuhan su, ja gitára lea su čuvvon eallimis. Nuorran lea son juo álgán čuojahit gitáran, ja dienna dat leat vuolgán olu nuohtat.

Lávddis vuosttaš geardde 1973

Vuosttaš geardde go son almmolaččat lávllui, lei 1973:s Mázes. Illa son duostai, muhto son goitge gorgŋii lávdáigos son duorggátgaccat čuojahii ja dorggiidaddi jienain lávllui lávlaga maid lei gullan Leif Wigeliusa ja Hartvig Hansena čuojaheamen ja lávlumin. Dán lávlaga namma lea "Guhkin lullin".

Álgo lávki lossat

Álgo lávkki muitala son lean lossadin, olmmoš illa duostašii, ballá boasttut bargamis. Muhto Issát Sámmul Hætta duostai ja dahtošii olbmui leat eanet roahkkadin, ii daga maidege jus veahá manaš boasttut. Ja go vuos oktii lea duosttán gorgŋet lávdái lávlut dahje juoigat, na de gal juo maŋŋelis duosttá.