Ikte buvttii ođđa eanandoallo- ja biebmoministtar Jon Georg Dale evttohusa rievdadit boazodoallolága vai doalaha dálá boazologu. Evttohusas čuovvu ahte filkkamánni galgá sáhttit mearridit boazulogui viđa jahkkái ovddasguvlui.
LOGA:
Dát ii leat buorre vuohki mo ášši čoavdit, oavvildit NBRas.
– Dáidda geat leat áiddo álgán, ja dat leat dábálaččat nuorra olbmot, lea dát evttohus heittot go dat han mielddisbuktá ahte dat eai beasa viđa jagis loktet boazuloguset, lohká NBR nubbinjođiheaddji Per John Anti.
Eai sáhte leat unnit 450 heakka guđeges
Viidásit čilge Anti ahte jus doallu ekonomláččat galggaš leat gánnáhahttin de berrejit leat unnimusat 450 heakka.
– Dán leat mii NBR:as iskan ovttasráđiid departtementtain ja Sámedikkiin, ja dan rápporttas boahtá ovdan ahte unnimusat fertejit leat 450 heakka jus galggaš leat birgenláhkai doalus.
Nugo dál lea dilli de leat sullii 60 doalu main lea menddo olu boazu, stáhta alimus boazulogu ektui, muitala Anti.
– Livččii buoret jus stáhta dáid baicce oasttašii eret, de soaittášii buorránit dilli dáidda geat vel báhcet, oaivvilda NBR:a nubbinjođiheaddji.
Stáhta: – eana dat mearrida
Doložis jo leamaš sáhka man ollu bohccuid Finnmárkku duoddarat girdet.
Go riikaráját bidjojedje 1760:s, de seammás mearriduvvui ahte Finnmárkkus eai galgan eambbo go 42.000 bohcco.
Sihke lohku ja mearri lea rievdan das rájes.
Ođđa áiggis lea boazulohku leamaš garra áššin masá 30 jagi jo. Boazolohku stuorui hirbmasit maŋŋá jagi 2000, ja 2006 ledje Finnmárkkus eambo go 185.000 bohccu.
– Ii leat mearridanváldi
Mannan eanandoalloministtar Sylvi Listhaug lei vuosttaš gii nagodii vuolidit boazologu 140.000:ii mii lei mearriduvvon alimus boazulohkun stáhta bealis. Ollusat oaivvildedje ahte vuohki mo stáhta dagai dan lei boasttut.
Dál lea ođđa ministtara Jon Georg Dale bargun doallat logu dálá dásis, ja NBR:a ii sáhte go geahččalit rávvet eisseváldiid.
– NBRa bealis oaidnit ahte eai leat leamaš nu buori prosessat dan boazulogu heivehan áššis. Mii leat álo vikkahan ahte eisseváldit galget guldalit orohagaid vai njuovžilit manašii boazulogu heivehanášši, nu dađi bahábut ii álo dahkku.