Ovttastuvvan Nášuvnnaid váldočoahkkin lea mearridan, ahte 2022-2032 lea ONa eamiálbmotgielaid logijahki. Gielda- ja guovlodepartemeanta ja Sámediggi leat ovttas ásahan nášunála ovttasbargoforuma mii galgá koordineret dán logijagi barggu Norggas.
Norgga olgoriikkaminsttar Anniken Huitfeldt (Bb) dadjá ahte šaddá ođđa áigodat davviriikkaid sihkkarvuođapolitihkas, dál go Suopma ohcá searvat Natoi.
– Lean vuordán goas Suoma sávaldat searvat Natoi almmuhuvvo. Mii leat ollesáigge oaivvildan ahte sin miellahttuvuohta lea buorrin Supmii, davviriikkaide ja Natoi, dadjá Huitfeldt NTBii.
Suoma presideanta Sauli Niinistö ja ráđđedus leat odne almmuhan ahte áigot ohcat miellahttun suodjalusovttastussii.
– Sis lea Norgga doarjja. Norgga bealis boahtit jođánit čađahit dárbbašlaš prosedyraid, ja láhčit vai jođánit dohkkehuvvo Stuoradikkis. Suoma miellahttuvuohta nanne davviriikkaid jiena ovttastusas, dadjá Huitfeldt.
Suopma háliida šaddat miellahttun Natos nu jođánit go vejolaš. Dán duođašta presideanta Sauli Niinistö odne preassadeaivvadeamis.
Mánnodaga galget vel Suoma riikkabeaivvit dadjat maid sii oaivvildit ovdal go ohcamuš sáddejuvvo Natoi.
– Mearrádus lea historjjálaš. Deháleamos lea Suoma ja min álbmoga sihkkarvuohta. Dát mearrádus nanne sihkkarvuođa ja ovttasbarggu eará davviriikkaiguin, dajai stáhtaminsttar Sanna Marin.
