"Spekulanttat" dat háliidit veahkehit báhtareddjiid geat bohtet Porsáŋgui

Mannan duorastaga mearridii Porsáŋggu gielddastivrra eanetlohku vuostávaldit gitta 25 báhtareaddij jahkásaččat boahtte golbma jagi. 12 gielddastivraáirasa dohkkehedje ráđđeolbmá árvalusa. Dasa lassin dohkkehedje sii maid ahte earát huksejit vuostáváldinfálaldagaid gildii. Ovddádusbellodaga 3 áirasa eai gal dán dohkkehan ja navdet baicce sin "spekulantan" geat ná áigut veahkehit báhtareddjiid.

Sárdnestuolus muitalii maid su vánhemat vásiheigga

Gielddastivrra sárdnestuolus muitalii Bargiidbellodaga Kåre Olli maid su vánhemat gárte vásihit eváhku áiggi oktavuođas mannan máilmmesoađi loahpageahčen go gárttaiga fatnasa mielde máttás guvlui ja ii lean álggos dihtosis gosa. Loahpas manai bures go soai beasaiga gáddái mátta Norggas.

Ovddádusbellodaga áirras navdá sin "spekulantan" geat háliidit veahkehit

Porsáŋggu gielddastivra mearridii maid diktit Nord Norsk Mottaksentera, Davvi-Norgga vuostáváldinguovddáža, gávdnat visttiid gielddas maid sii de geavahit vuostáváldit báhtareddjiid geat bohtet gildii. Ovddádusbellodaga Torgeir Thomassen navdá sin "spekulantan" geat ná háliidit ruđaid dinet. Thomassen logai dákkár gjuovddážiid dinet ruhtalána báhtareddjiid námas. Sin mielas lea maid nu ahte go gielda juo dál rahčá addit dohkálaš fuola- ja dearvvašvouđafáldaldagaid Porsáŋggu álbmogii de gal buot dearvvašvuođa bálvalusat jávket go gielda vuostáváldigoahtá báhtareddjiid.

Son lea ilus dainna mearrádusain

Nord Norsk Mottaksentera, Davv-Norgga vuostáváldinguovddáža Are Skancke Andreassen čuovui gielddastivračoahkkima ja lohká leat ilus go Porsáŋggu gielddastivra sávvá báhtareddjiide bures boahttin gildii. Jos fal dát mearrádus govve Porsáŋggu álbmoga oainnu de ii sáhte dát šaddat eará go buorre logai son. Sis lea jurdda geavahit Fjordutsikten gohttensaji Leavnnjas ja Bissojoga internáhta dáid doaimmaide logai son.