Davviameriikkálaš pateanta ja trademark doaimmahat lea váldán eret joavkku dovdomearka pateantasuoji.
Doaimmahagaid mielde joavkku namma «Ruksesliikkagat» lea rasisttalaš ja badjelgeahččá álgoálbmogiid.
– Fasttes namma
Ara Aikio, orru suomabeale Ohcejogas. Son lea sápmelaš ja Canada indiana. Vaikko son lea bajásšaddan Sámis, de son lea maid dovdá searvvi nama rasisttalaččain iežaset kultuvra vuostá.
– Dat lea hui fasttes ja rasisttalaš namma min olbmuide, masa mii eat liiko ieža. Dakkár dovdomearkkat eai gudnejahtte min olbmoárvvuid. Dat lea dábálaš ahte eanetlogu álbmot ná dahká minoritehtaid kultuvra ja juste álgoálbmogiid vuostá.
(Ášši joatká gova vuolde)
- Loga maid:
Seamma go «lappish»
Álgoálbmogat miehtá máilmmi leat dovdan ahte sin kultuvra geavahuvvo dovdomearkan earáide, mii lea vearrut. Ánde Somby mielas dakkár áššit galggaše maiddái Sámis váldojuvvot vuhtii.
– Ovdamearkka dihte «Joikaboller» mii lea veahá badjelgeahččan namma dáppe Sámis, nu ahte die lea diekkár ášši mii ii guoská dušše Ameriiká indiánaide muhto maiddai Sápmái. Mis leat maiddai hui olu «Lappi» ja «Lapland» namat sierralágan buktagiin mainna galggašii juoidá dahkat ja man birra mii maid galggašeimmet boktit ságastallama, lohká Somby.
Aikio lea ovttaoaivilis Sombyin ja su mielas dakkár dovdomearkkat turistafitnodagain addet romes gova sapmlaččaid birra:
– Sápmelaš vuvdojuvvo olgomáilmmis dego dakkár duolva ja juhkkis olmmoš, vaikko mii leat áibbas dábálaš olbmot nu go earát ge.
Vuoigatvuohtaollášupmi
Doaimmahaga mearrádus ii bágge goitge sin luohpat «Redskins» nama, vaikko Davvi-Amerihkká álgoálbmot leat juo guhkes áiggi gáibidan sin rievdadit nama ja atnet «Ruksesliikkagat» nama rasisttalaččain.
Maiddai Davvi-Amerihkká senáhtas leat vihttalogi senáhtaovddasteaddji gáibidan sin heitit atnimis nama. Sii leat sádden reivve Washington Redskins jovkui ja ávžžuhan sin rievdadit nama. Mannan čavčča doarjjui maiddai Davvi-Amerihkká presideanta Barack Obama nammarievdadusa.
Sámi jurista Ánde Somby mielas dát lea buorre álgoálbmogiid vuoigatvuođaid ovdáneamis:
– Dat lea buorre ođas sihke olbmuide geat leat máŋga jagi dáinna bargan, ja muđuid álgoálbmogiidda hui dehálaš.
Aikio mielas lei buorre mearrádus áššis.
– Dát nanusmahttá álgoálbmogiid, ja buorida sin iešdovddu. Muhto dás dieđusge manná vel guhka ovdal go namma rievdá.
Redskins lea váidán mearrádusa pateantasuodjái. Joavkku dovdomearka lea suodjaluvvon dassážii boahtá fas mearrádus .
- Loga maid:
- Loga maid: