Rawdna Carita Eira muitala iežaska Anitta Suikkariinan hápmen dáid dološ teavsttaid teáhterčájálmassan. Soai dat leaba jorgalan teavstta eaŋgalasgielas dárogillii, ja de lea Britt Inga Vars jorgalan dan sámegillii. Dál lea dát gárvvistuvvon teáhterbihttan. Haukur J. Gunnarsson dat leamašan bagadallin bihtás, ja Anitta Suikkari ovdanbuktá monologa lávddis.
5000 jagi boares teaksta lávdái
Rawdna Carita Eira muitala ahte dán don doloža teavsttas, das leat sullii seamma áššit mat digaštallojit go maid miige dán áigge digaštallat.
Myhta čájeha nuorra nissonolbmo mátki rávásmuvvama- ja viisodaga guvlui. Su dásseárvosaš rahčamušaide ja amasvuođa ohcamušaide.
Dát lea ráhkesvuođa máinnas, jierbmivuođa ja dássádaga áibbašeapmi ja soaitá maid máilmmi historja áiggid čáđa. Dát lea historjá ovdal Biibbala ja Korána, ja maiddái myhta mii lea leamaš ovdal min oarjemáilmme sivilašuvnna vuođđudeami.
Teaksta lea čállon monologan
Anitta Suikkari dat galgá lávddis leat dáinna monologan. Soai leaba Rawdna Carita Eirráin dramatiseren teavstta, mii lea Sumera kile čállagiin vižžon. Britt Inga Vars lea sutno dárogielteavstta jorgalan sámegillii. Haukur J. Gunnasson leamasan ges bagadallin bihtás mas vuosttaš čájáhus lea lávvardaga geassemánu 14. beaivvi Álttas.