Asbjørg Skåden muitala iežas guhká bargan dáinna girjjiin, moaddegoalmmatlot jagi. Muhto dál lea su girji "Márkku sánit" almmustuvvan. Son lea guhká čohkken dasa sániid, ja oktiibuot leat sus 117 registrerejuvvon informantta, olbmot geat leat muitalan ja čilgen sutnje dáid sániid. Ja buohkain dáin lea sámegiella leamaš vuosttašgiellan.
Ollu guovlluin informánttat
Sániid lea son čohkken sámegiellagiin Skániin guovllus, Evenáššis, Ballagis, Rivttatvuonas, Háštas, Loabáin, Leaŋgaviikas, Narviikkas, Siellagis ja Dilddanuoris. Boarraseapmosa gean son lea jearahallan lei riegádan 1800-logus. Ja nuoramus ges 1942:s.
Asbjørg Skåden lea bargan oahpaheaddjin ja muitala iežas geavahan iežas čohkkejuvvon sániid maid oahpahusas.
Ollu jagiid iežas eallimis lea son geavahan dán girjái maid dál lea almmuhan, muhto dál son gal lea geargan dáinna prošeavttain.