– Ávjovári álgoálbmotregiuvnna doaibma maid raššu dalle dán ovttasbarggus, oaivvilda gis Guovdageainnu suohkana ráđđealmmái Odd Keskitalo.
Poršánggu gielda gálgá 20 milliovnnain vuolidit iežas bušeahta, ja dan oktavuođas árvala ge Poršáŋggu ráđđealmmái, Gunnar Lillebo, gieldda geassádit Ávjovári álgoálbmotguovllu ovttasbarggus.
Máksá 80.000 ruvnna
Ávjovári álgoálbmotguovllu ovttasbarggus leat otne mielde golbma gieldda, namalasssii Porsángu, Kárášjohka ja Guovdageaidnu.
–Juohke gieldda jahkásaš golut lea lagabui 170 duhát, muhto dán jagi eai šatta eambbo go 80 duhát juohke gildii, go čállingoddi ii leat vel doaimmas nu mo galggašii.
Áigumuš livčče ovttasbarggu bokte gávnnahit čovdosiid mat nannešedje gielddaid doaimmaid nu ahte livčče vejolaš vel ruđa ge seastit, lohká Keskitalo.
Poršáŋgu váttis dilis
Muhto de lea Poršáŋgu šaddan dakkár dillái ahte ferte seastit 20 milliovnna, ja dan oktavuođas de árvalit earret eará geassádit dán Ávjovári ovttasbarggus. Loahpalaš mearrádus váldo jáhku mielde miessemánu 28.b. gielddastivrra čoahkkimis.
Ávjovári álgoálbmotguovllu stivrrajođiheaddji leat don Guovdageain sátnejođiheaddji, Klemet Erland Hætta, ja mo du mielas orru go
Poršángu dál árvvoštallá geassádit dán ovttasbarggus?
– Mun ipmirdan bures ahte Poršáŋggu gielda dál ferte árvvoštallat buot seastinvejolašvuođaid mat ležžet, ja mun jáhkán sis lea dat gelbbolašvuohta mii adno dán oktavuođas, lohká Hætta.
– Seastinvejolašvuohta
Hætta mielas gal lea gielddain seastinvejolašvuohta dán ovttasbarggus.
– Go eambbo suohkanat ovttasbarget, de sáhtašii oažžut daid oktasaš goluid vulos, nu ahte áiggi badjil galggašii leat vejolaš suohkaniin seastit ruđa, lohká Hætta.
Son ii dieđe vuos dadjat mo geassádeapmi váikkuhivčče daid ovttasbargodoaimmaide.
– Mánáidsuodjalus gillá
Kárášjoga sátnejođiheaddji Kjell Sæther gis balaha ahte mánáidsuodjalus ja gielddaid IT-bálvalus šaddá gillát jus Poršángu geassádeaš.
– Dat šaddá váddásat čađahit daid ovttasbargodoaimmaid mat leat mis, nu go earret eará mánáidsuodjalus ja gielddaid ovttasbargu IT-bálvalusa oktavuođas, dadjá Sæther.
