NRK Meny
Normal

Sámediggi mielde boahtte jagi

Sámediggi ii lean mielde dán jagi EuroPride dáhpáhusas go eai sáhttán rievdadit sohppon šiehtadusaid. Sámediggeráđđi Henrik Olsen goittot lohppida, ahte boahtte jagi sii oassálastet dáhpáhussii.

Samer og Sameminister Jan Tore Sanner i homoparade.

Sámeministtar Jan Tore Sanner oassálsttii EuroPride vázzimii ovttas sámi homofiillaiguin

Foto: Mette Ballovara / NRK

Vássán vahkus lei EuroPride dáhpáhus Oslos ja lávvardaga lei homopride vázzin. Dasa oassálasttii maiddái sámeministtar Jan Tore Sanner ovttas sámi homofiillaiguin. Sámediggi ii beassan dán jagi mielde.

–Sii ožzo bovdejumi nu oanehis áiggi ovdal dáid doaluid, danne Sámediggi dán jagi dađi bahat ii sáhttán searvat. čilge Olsen samediggeradis.

Sámi homofiillaid ángirdeaddji Leammuid Lemet Ánde - Lemet Ánde Stueng dat lei bovden sámedikki mielde oassálasatit dáid doaluide. Son leige veháš behtton go sámediggi ii beassan leat mielde, muhto lei gal ilus go sámeministtar oassálasttii vázzimii.

Samisk deltakelse i Europrideparade 2014.

Sápmelaččat oidnosis EuroPride dáhpáhusas

Foto: Mette Ballovara / NRK

Dehalaš maiddái sámediggái

Sámediggái lea dehalaš čalmmustahttit buot sápmelaččaid vuoigatvuođaid. Maiddái sámi homofiillaid vuoigatvuođat leat dehalaččat. Dan deattuha sámediggeráđđi Henrik Olsen.

–Sámi servodagas soaittát olgguštuvvot jos leat homofiila, lesba dahje transseksuala. Danne lea dehalaš, ahte sámediggi lea mielde dákkár dáhpáhusain ja doaluin vai olbmot duostagoađašedje čájehit iežaset seksualitehta rahpasit, dadjá Olsen.

Sámediggeráđđi leage gieskat bargagoahtan ođđa dásseárvoplánain. Das leat mielde maiddái sámi homofiillaid vuoigatvuođat.

Guldal ášši:

Mette Ballovara

Rabasvuohta dehalaš

Lea dehalaš duostat čájehit gii don leat go dan lahkái áddejupmi ja diehtu maid lassána, oaivvilda gieldda- ja ođasmahttinministtar Jan Tore Sanner. Politihkkárin sus leage ovddasvástádus dahkat dan maid sáhttá vai gierdevášvuohta servodagas lassána, oaivvilda son.

Sámediggeráđđi Henrik Olsen lea ilus go stáhtaráđđi čájeha ná stuorra beroštumi.

–Duođai buorre go Jan Tore Sanner lei mielde. Mii maid livččiimet mielas oassálasttán ja čájehan sámedikki amadaju homopride vázzimis, dadjá Henrik Olsen.

Jan Tore Sanner.

Sámeministtar Jan Tore Sanner EuroPride dáhpáhusas

Foto: Mette Ballovara / NRK