Girječálli Rauni Magga Lukkari reaškkiha go sávan sutnje lihkku dainna go lea fitnen iežas teahterbihttá "Lihkkošalmmái" dohkkehuvvot Nášunalteahterii čájálmassan. Lukkarii illuda dál go Beaivváš Sámi Teahter ii fuollan su bihttá čájálmassan, ainnat jos Beaivváš livččii dohkkehan dán de ii livčče son goassige ádden jorgalahttit iežas čállosa dárogillii.
Drámatihkkafestiválii
Norgga Nášunalteahter čájeha Dramatikkfestivalas Rauni Magga Lukkari bihttá "Lihkkošalmmái". Dát festivála lea golggotmánu 9.beaivve rájes gitta 13. beaivvi rádjai. Dán mánus vuolláčállá Rauna Magga Lukkarii šiehtadusa mas mieđiha teahterbihtás vuovdit Norsk Dramatikkfestiválii.
Prosa teavsttaid čállá
Rauni Magga Lukkari muitala Nordlys aviisii ahte son maŋimuš vihta jagi lea hárjehallagoahán čállit prosa teavsttaid. Seammás muitala iežas lean dolkan čállimis morašlaš ja váivves divttaid. Telefovnnas muitalasttá munnje iežas dál mearridan čállit aivvefal ilolaš áššiin. Bihttá "Lihkkošalmmái" lea justa dakkar mas veaháš lea bilko maiddái, mas olbmot maiddái nagadit somádit bilkidit iežaset.
"Lihkkošalmmái"
Teahterbihtas "Lihkkkošalmmái" čállá Rauni Magga Lukkari ovtta oasážis ná: " Mun muittán maiddái go oktiiges vulgen ruovttus eret, dalle dolin, nuorran. Jurddašin beassat veahá guhkkelabbui, eret das eatni ja ahči julggiid vuolde. Muhto maid galggaš. Eai gollan go moadde oanehis mánotbaji ovdalgo dovdagohtet mo náhpečuolli čávgagođii. Mun meinen dien náhpečuoli mii lea máná ja eatni gaskas. Vuoi árpmit, man issoras unohas dovdu lei gessot, jorrat birra dego čoarvegiella suohpanageahčen". Nie son čállá lihkošalbmás.
Geas sáhka
Lukkari muitala bihtás leat sága 60 jahkásaš albmás, ja su jurdagiin maŋŋil go su eadni jámii. Dás maid lea sáhka das mo lea eallit ja ássat rádjaguovllus Deanus. Lukkari muitala iežas oktii oaidnán filmma mas lei sáhka rádjaguovllu ássiin, danne son fuomášii čállit dás. Dát eallin dagahii sin buohkaid veaháš skealbman, go sii han gal oastestedje duos dás eanet go maid lei lohpi nuppebeal rájá.
Teahterii čállingilvu
Rauni Magga Lukkari lei okta 70 čállis geat ledje sadden teahterbihttá árvalussan 2007 Samtidsfestiválii. Lukkari lei okta gávcci čállis gean bihttá dohkkehuvvui ja válljejuvvui. Nu galge buot teahterat Norggas mat ožžo stáhtadoarjaga válljet bihtá maid hálidit buvttadit čájalmassan. Nu geavaige ahte Nášunalteahter válljii Rauini Magga Lukkarii bihtá "Lihkkošalbmmái" čájálmassan.
Beaivváš Sámi Teahter ii fuollan
"Lihkkošalbmá" bihtá lei Rauni Magga Lukkari fállan Beaivváš Sámi Teahterii, muhto eai sii dohkkehan dán ráhkadit čájálmassan. Dáinna illuda Lukkari dál, ainnat dál lea teaherbihtás fitnen Nášunalteahterii ja dat leat olu eanet gutnin sutnje, rámposta Rauni Magga Lukkari.
