«Láikkes» sápmelaččat leat dál ođđa áiggi ovdagovat

Servvodat lea dál jorggiheamen. Karriearabagadallit dadjet ahte sápmelačča eallinvuohki lea dan maid maiddái gávpotolbmot ohcalit.

Rolf Ante Hætta čohkká jokŋadakŋasiid gasku

VÁLLJEN EALLINVUOGI: Rolf Ante Hætta mielas lea dat buoremus mii gávdnu ieš beassat viežžat borramuša láhkabirrasis.

Foto: Ewa-Mari Hedman / NRK

– Dát ii leat láikkes olbmo bargu obanassiige. Ferte viššat olggos mannat jus murjjiid áigu, dat eai boađe beavddi ála iešalddis gal, dadjá Rolf Ante Hætta.

Son lea murjemin Guovdageainnus. Spánnja dievva joŋat.

Hætta barga mánáidgárddis, muhto sutnje lea iešbirgejupmi dehálaš.

Ovdalaš áigge ii lean dát vuohki dohkkehuvvon stuorra servvodagas. Ledje láikkes olbmot geat eai veadján go bargat oasi jagis, ja muđui oaggut, bivdit ja murjet.

Dál lea jorggihan. Dál Hætta dološvuohki lea ođđaáigásaš vuohki.

– Sápmelaččaid eallinvuohki lea nanaguoddevaš

Oarjemáilmmis ja Norggas leamaš kárriearegizzun ja loahpalaččat beassat hoavdan muhtin fitnodagas dat ideála eallinvuohki.

Muhto dákkár ráđiid eai atte šat karriearabagadallit.

Ansiktsbilde av Susanne Lupton

– BOAHTTEÁIGÁI BUORRE: Karriere Finmmark karriearabagadalli Susanne Lupton oaivvilda ahte sápmelaččaid eallinvugiin sihkkarasttu boahtteáigi. Nu mo dán áigásaš dálkkádatpolitihkkárat háliidivččet.

Foto: Skjermdump / NRK

– Mii oaidnit ahte sápmelaččaid eallinvuohki heive hui bures oktii daid ođđa áigásaš jurddavugiin. Dan dáfus go dál lea nanaguoddevaš eallin luonddumáilmmiin mii lea ođđa áiggi vuohki, dadjá Susanne Lupton Karrieara Finnmárkku karriearabagadalli ja prošeaktajođiheaddji.

Lupton deattuha ahte go sii dás boahtteáiggiis addet karrieararáđiid, de lea olbmuid iežaset sávaldagat guovddážis.

– Maid háliidat don? Mii dahká du lihkolažžan? Dáid gažaldagaid jearrat mii. Dat ii leat nu sihkkar ahte olahit alimus virgái lea dat mii dahká olbmo lihkolažžan, dadjá Lupton.

Karrieara Finnmárkku prošeakta jođiheaddji oaidná ovdamuniid das mo sápmelaččat leat áiggiid čađa eallán, sii dávjá válljejit birgenlági iežaset árbevieruid ja árvvuid vuođul .

Bajásšaddan luonddumáilmmis

Rolf Ante Hætta jáhkká ahte sivvan manin sápmelaččaide lea lunddolaš meahcástallat lea danin go leat bajásšaddan láhka luonddumáilmmi. Nu ain juo vis leamaš sutnje.

– Lea hui buorre dovdu rupmášii, go eat dárbbaš rámbuvrris fitnat viežžamin diŋggaid. Mii sáhttit ieža ávkkástallat das mii gávdno min birrasis, dadjá Hætta.

Son ii daja iežas goassege loaktit kántorbargin. Rolf Ante dárbbaša leat olgon lihkadeamen.

– Dan mun beasan dálá bárggu oktavuođas! Dasa lassin seailluhuvvojit sámegiel luonddumáilmmi sánit go mánát daid ohpet praktihkalaččat.

Rolf Ante Hætta čuollá ákšun

DÁLKKAS: Vaikko ii Hætta ii dárbbašivččii murjet, bivdit ja muđui meahcis viežžat biepmu, de son dattege dahká dan, go sutnje lea dát dálkkas.

Foto: Ewa-Mari HEdman / NRK