–Ii mearkkaš nu olu sámepolitihkkii

Vaikko vel Sverigedemokraterna oaččui stuorra doarjaga Ruoŧa riikabeaiveválggain, de ii jáhke nuorra sáme- ja gielddapolitihkkár Káren-Ann Hurri (22) ahte das lea stuorra mearkkašupmi sápmelaččaid dillái Ruoŧas. – Riikka dásis ii leat goassege leamaš beroštupmi ovddidit sámeáššiid, nu ahte dan dáfus gal ii rievdda olus dálge, dadjá Hurri. Sverigedemokraterna lea bellodat mii garrasit kritisere earret eará Ruoŧa sisafárrenpolitihka. Bellodat orru oažžumin 62 mandáhta. Ruoŧa Riikabeivviin leat 349 áirasa.