NRK Meny
Normal

Moittii avissa - čievččastuvvui čállin

Ságat čálli moittii iežas doaimmahusa kommentáras. Dál lea su spálta jávkaduvvon.

Hivands hjørne

Ságat aviissa fásta kommentáhtor Pål Hivand moittii iežas aviissa go dikte politihkkára buohtastahttit Sámediggepresideantta Egil Olli, Hitleriin.

Dál lea son geavvan eret.

GULDAL: Ságat čálli čievččastuvvui

Hivand čuoččuha ahte danne dat Ságat ii šat fuola su bálvalusaid. Hivand lohká iežas ožžon dieđu ahte Ságat avissa váldodoaimmaheaddji ii liikon su moaitagiidda, ja danne heaittihuvvo su spálta.

Nu luohpáge Hivands hjørne, dahje Hivanda čiehka, mii lea leamaš measta jagi fásta spáltan Ságat avissas. Das Hivand kommenterii áššiid ja dáhpáhusaid.

Dán vahko álggus čálii HIvand spalttastis ahte aviisa lei vuolimus journalistalaš dássái njiedjan go dikte Ovddádusbellodaga politihkkára Thorvald Aspenesa buohtastahttit Sámedikkepresideanta Hitleriin, jearrakeahttá kritihkalaš gažaldagaid.

Spaltista lohká iežas dohkkehit ahte váldodoaimmaheaddji čievččasta su, muhto imašta manne juste dán ášši ani nu vahágin, go dás han lea sáhka maid heive dahkat ja maid ii.

Hivanda mielas lea áibbas endorii buohtastahttit Sámepolitihka nazismmain.

Ságat váldodoaimmaheaddji Geir Wulff ii hálit kommenteret ášši Sámi Radioi.