NRK Meny
Normal

Beakkán spábbačiekčangilvu čohkke olbmuid golmma riikkas

Juohke jagi gaskkamutto skábmamáno lágiduvvo beakkán spábbačiekčanturneringa Nilut cup, mii čohkke olu nuoraid Guovdageidnui.

Nilut Cup 2014

Govviduvvon Nilut cup čiekčamiin, jagi 2014s.

Foto: Sara Beate Eira / NRK Sápmi

Nilut cup lea futsal spábbačiekčangilvu mii dán jagi lágiduvvo skábmamánu 17 beaivvis gitta 19 beaivái, Guovdageainnus.

Dán rádjai leat 21 joavkku dieđihuvvon gilvvuide, 13 dievdojoavkku ja gávcci nissonjoavkku, guokte joavkku leat ain árvvoštallame sotnabeaivái ahte servet go, muitala Nilut cup jođiheaddji, Isak Ole Hætta.

Seamma áigge čiekčamat hástalussan

Okta smávva hástalus dán jagi lea go Tromssa bealde leat justa dan lávvardaga futsal ráidočiekčamat. Spábbačiekčanjoavku Skániin dat lea jearran maŋidit iežaset ráidočiekčama vai beasašedje searvat Nilut cupii.

Leago ain vejolaš dieđihit joavkku čiekčamiidda?

– Jo de lea, váikko dieđihanáigemearri lei bidjon čakčamánu 30 beaivái, de gárttaimet viiddidit áigemeari álggogeahčai boahtte vahku, go eai lean doarvái joavkkut dieđihuvvon. Nubbi sivva lea fas dat go eat leat vel geargan vuorbádit puljaid, dadjá Hætta.

Isak Ole Hætta, sportslig leder i Nilut Cup

JOĐIHEADDJI: Nilut cup jođiheaddji, Isak Ole Hætta.

Foto: Liv Inger Somby

Olu joavkkut oassálastet

Dábálaččat muitala Isak Ole iežaset čáhkkehit birrasiid 26-27 joavkku gilvvuide. Ovddit jagiid leat sihke Ruoŧa- ja suomabeale joavkkut searvan.

– Dán jagi eai searvva go golbma dievdojoavkku ja okta nissonjoavku Ruoŧa bealde, muđui leat eanaš joavkkut dás lagasbirrasis mat servet.

Buoriáiggis rahkánišgoahtán

Gilvvuide muitala Isak Ole Hætta áigá jo rahkánišgoahtán, ja nu leat maid ásahan bargojoavkku, mat dal de hoidejit iežaset doaimmaid.

– Áidna mii vel lea báhccán, lea vuorbádit puljaid ja ráhkadit čuldosa mas oaidná makkár joavkkut de galget čiekčat vuostálaga, loahpaha Hætta.

  • Guldal rádiojearahállama dás: