NRK Meny
Normal

NSR:a ovttas bargiidbellodagain

Ikte eahkes álggahii Norgga Sámiid Riikkasearvi šiehtadallamiid Bargiidbellodagain. Eahpečielggas gii šaddá Sámedikki presidentan ja várrepresidentan.

 

Sametinget
Foto: Eilif Aslaksen / NRK

Norgga Sámiid Riikkasearvi lea bovden Bargiidbellodaga joavkku šiehtadallamiidda ja dál leat árvvoštallame ahte nagodit go dát guokte joavkku bargagoahtit ovttas.

Lea eahpečielggas mo juogadit njunuš posišuvnnaid, muhto ii goabbáge joavku háliidan ikte eahkes muitalit makkár gáibádusat leat ovttasbargui.

  GULDAL: NSR:a álggaha ovttasbarggu

- Čorget moivedili

Sámediggepresidenta Aili Keskitalo dajai ievttá preassakonfereanssas ahte NSR háliida čorget moivedili ja nu geahččalit ovttasbargagoahtit stuorámus opposišuvdnajoavkkuin.

- Mii eat hálit stivret Sámedikki áššis áššái, go Sámediggi lea

Sametingspresident Aili Keskitalo
Foto: Liv Inger Somby / NRK

huksejuvvon eanetlogu vuogádaga bokte, logai Keskitalo.

- Berošta go bargiidbellodat

- NSR:a lea jearran bargiidbellodagas berošta go singuin ságastit ovttasbarggu birra, muhto son ii sáhte dadjat maidege man realistalaš dákkár ovttasbargu lea, ovdal go oaidná, lohká Keskitalo.

Naba, dat golbma eará geat otne leat din ovttasbarggus, Terje Tretnes, Per A Bæhr ja Olaf Eliassen, maid sidjiide ledjet muitalan?

- Mii leat muitalan ahte mii hálideat cegget eanetlogu molssaeavttu Sámediggái, ja mii leat maiddái dadjan sidjiide ahte mii  leat rahpasat joatkit ovttasbarggu singuin, jus dat leš vejolaš.

- Mii leat rahpasat ovttasbargui

Go jearrat bargiidbellodaga Sámedikki parlamentaralaš jođiheaddjis Egil Ollis mo su mielas orru dát ovttasbargobovdejupmi, de duođašta son ahte sii leat rahpasat ságastallagoahtit.

Arbeiderpartiets sametingsgruppes leder Egil Olli
Foto: Eilif Aslaksen/NRK Sami Radio

- Ja lea han gal nu ahte go diekkár stuorra eanetlohku stivregoahtá, de lea dat eanet stabiila, lohká Olli.

- Posišuvnnain ii leat vuos sáhka

- Mii eat leat oppa álgán ge háleštit vuos, ja mun gal in oppa buvttášii ge makkár ge gáibádusaid mediaid badjil, lohká Olli.

Lea go lunddolaš ahte don šattat várrepresideantan?

- Mun in buvtte makkár ge kommentara diesa.

Lea go lunddolaš ahte don šattat presideantan?

- In dasa ge fástit maidege, lohká Olli.

- Bovden vuos ságaide

-Mii leat dál vuos dušše bovden ságastallamiidda, mii eat leat šiehtadallagoahtán, ja mis ii leat vuos dalle sáhka posišuvnnain, lohká presideanta Keskitalo.