Jurdda čállit girjji «Hamburger Prinseassa» muitala nuorra girječálli, Saia Stueng boahtán váccedettiin joatkkaskuvlla, ja dál leage maid ožžon ruhtadoarjaga Norgga sámedikkis, almmuhan dihte iežas girjji.
Rašes áigi
Son válljii čállit nuorravuođa birra go dat lea dehálaš oassi olbmo eallimis, dalle han olmmoš hábme iežas ja vállje maiddái iežas eallin geainnu. – Dat lea hui rašes áigi, muitala Stueng.
Vaikko son ii dáhto beare olu muitalit girjjis, de dadjá ahte girji sisttisdoallá earret eará dán áigge drámá. Dat lea nuorravuođa eallima birra, sin hástalusain, bártin jnv.
– Dat muittuha veahá drámá maid oainnášit earret eará Skam TV ráiddus NRK:S.
Sámediggeráđđi juolludan ruđa
Norgga sámediggeráđđi dat lea juolludan doarjaga sámi girjjálašvuođa almmuhemiide dán jahkái.
Sii ledje ožžon lagabui 100 ohcama, ja ollislaš doarjjaohcansubmi lei sullii 25 miljon kruvnnu.
Saia Stueng lea maid gazzan čállioahpu maid Sámedikki ja Sámi Dáiddaráđi/Sámi girječálli Searvvi lágidii.
Dán jahkái lei várrejuvvon birrasiid 6 miljon kruvnnu sámi girjjálašvuhtii, dieđihii Norgga sámediggi preassadieđáhusa bokte.
- Guldal olles jearahállama dás: