Giđđat beassá Norgga álbmot oaidnit John Sammola «Ex on the beach» nammasaš TV-ráiddus.
Dán ráiddus deaivvadit oasseváldit ovddeš morsiin dahje irggiin ja galget dálostallat badjelaš mánu.
– Norga ánssáša oaidnit mu, go mun lean nu buorre olmmoš, dadjá John Sammol.
Dan veaháža maid beassá muitalit ráiddus, lea ahte mii oaidnit irggástallama/moarsastallama, diggoma, juhkama ja olu eambbo.
– Beassabehtet illudit dassá go oidnogoađán TV:s, čaimmiha John Sammol.
EX ON THE BEACH: John Sammol lea sihke Kárášjoga ja Guovdageainnu bárdni. Son orru dál Romssas, gos lea leamaš studeantan.
Foto: Anders Boine Verstad / NRKSon lea rámis dainna go lea sápmelaš, ja sutnje lea maid dehálaš čájehit dán beali TV:s.
– Dál lea áigi ahte sápmelaš beassá buori TV ráhkadit, muitala John Sammol.
John Sammol bearaš ja su skihpárat lohket somán go searvá dán TV-ráidui. Son muitala iežas bearraša álo dorjon su.
– Skihpáriid mielas lea nu somá ahte oidnogoađán TV:s! Sin mielas mun lean somás olmmái, ja oaivvildit ahte ráhkadan buori TV, čaibmá John Sammol.
Eai beare buorit
Erik Anders Sæter, gii 2018:s lei mielde «Paradise Hotel» nammasaš TV-ráiddus, čilge ahte lea vásáhus beassat mielde TV-ráidduide. Muhto son sáhttá maid muitalit ahte son lea maid dovdan albma, garra duohtavuođa. Son navddii iežas nu miellagiddevažžan ahte dainna sáhtii dahkat karrieara, muhto nu ii lean.
PARADISE HOTEL: Erik Anders Sæter navddii iežas miellagiddevažžan
Foto: Aksel Sjøli– Go šadden dovddusin, de mus easka šaddagohte rutiinnat. Mun bággehallen árrat njuiket, fuobmájin jođánit ahte olbmot eai gille bargat muinna jus láikkohalan, čilge son.
Vaikke vel bargá garrasit, de ii dovdda iežas vel lihkostuvvan.
– Mun oainnán dál ahte ledjen galgat olu garraseappot bargat. Mun ledjen galgat ávkkástallat dovddusvuođa buorebut, muitala Erik.
Erik beasai searvat «Farmen Kjendis »TV-ráidui maŋŋel «Paradise Hotela» oassálastima. Son oaivvilda ahte jus ii lean dohko beassat, de lei su fuomášupmi nohkat olu jođáneappot.
Ođđa sámi beakkálmasat
Sihke John Sammol ja Erik šattaiga dovddusin čalbmeravkalanbottas, ja goappašagat muitaleaba ahte lea leamaš hui somá go nie olu fuomášumi leaba ožžon.
– Mun dovden ahte olbmot liikojedje munnje, ja dohkkehedje mu nu mo mun lean, muitala Erik.
John Sammol ii leat vel oidnon TV:s, muhto čilge iežas vásáhusaid ná:
– Mun liikon oažžut fuomášumi, ja eaige leat goassege ovdal leamaš ná olu olbmot geat háliidit mu čuovvut Instagrammas!
