NRK Meny
Normal

Šearradis govat čalmmehuhttet

Olles čájáhuslanjas šearrájit Alf Magne Salo fiskkesivnnat govat. Dát leat njuhtamat maid son maŋimuš áiggis lea dáhkan. Govvačájáhusas Sámi Dáiddaguovddážis Kárášjogas oaidna maid su dáiddalašvuođa rievdama maŋimus logi jagis.

Salo govat
Foto: Anne Olli / NRK

Gula Alf Magne Salo govvačájáhusa árvvoštallama

Salo govva

Geahča hámiid, eanet sneaktadis linnját

Foto: Anne Olli / NRK

Go čákŋalin Sámi Dáiddaguovddážii de beanta čalmmehuvven, go vuosttaš maidda čálmmit darvánedje ledje fiskkes ivnnat stuorra govat. Dáid govain in riekta oainne earágo iešguđetge laganaš fiskkesivnnat hámiid, muhtimat dego bohcco- dahje sávzabealljjit main lea bealljemearka, ja eará hámit leat ges oaidnit dego iešguđetge stuorrosaš lasttat mat govddodit čážis.

Dego lasttat dahjege bealljemearkkat
Foto: Anne Olli / NRK

Šerreš ivnnit

Eai mu čálmmit vuoiŋŋas dáid oaidnit, danne sirddán siskkit latnjii, doppe heaŋgájit maid eará ivnnat njuohtamat. Muhtimat dáin leat govat maid Alf Magne Salo lea njuohtan 1990-logus. Dáid govain leat seavdnadat ivnnit, muhto maiddái šerres rukses ivnnit.

Hápmi rievda

1990-logu loahpabeallái rievdagohtet Salo govain sneaktadis linnját, ivnnit maid rivdet seavdnjes ivnniin čuovgadat ivnniide. Formalismma, - hámit iešguđetge sturrodagas. Litna forpmat ihttigohtet 1990-logu loahpas.

Salo ruksesáigoda govva

Salo ruksesáigodaga govva

Foto: Anne Olli / NRK

Hámit badjálagaid

Salo maid báhpiris čuohppá hámiid, dáiddá lea njuohtan ivnniid mat rievtti mielde eai heivešii oktii, muhto dát leat vuohkkasit bardon badjálagaid. Dáid govain dego báitet eará hámit vuolábealde.

Jåksa dálus bargan

Alf Magne Salo lea muhtin áigge orron Iver Jåks dálus Kárášjogas ja doppe son lea njuohtan oasi govain mat dál leat oaidnimis Sámi Dáiddaguovddážis. Su govat leat oalle abstrakta, ii dain riekta oainne earágo iešguđetlaganaš forpmaid. Su málánvuohki vuolgá eanet ovddešáigge europealaš dáiddavuogis. Sámi Dáiddaguovddáš čállá preassadieđáhusastis ahte Salo govain vuhtto nannosit formalisma, ja son geavaha ivnniid mat rievttimielde eai heivešii oktii.

Davvi Romssas eret

Alf Magne Salo lea Boaresfiervvás Gáivuonas Davvi Romssas eret. Son lea Dánmarkkus váldán dáiddaoahppu ja vuosttaš dáiddačájáhus lei sus 1982:s