Politiijat Finnmárkkus čállet Facebook:i ahte sii háliidit dieđuid áššis go ealgabeana lea gávdnon báhččon.
Beana gávdnui 15-20 km eret Kárášjogas Leavnnja guvlui, ja 2,5 km eret geainnus Nieidavári guvlui.
Beanaeaiggát lei gaskavahkku ohcame beatnaga go lei jávkkihan, iige boahtán ruovttoluotta go sevnnjodii. Ikte gávnnai son beatnaga báhččon.
Politiijat dieđihit ahte leat leamaš báikkis ja sihkkarastán luottaid.
Sii háliidit oktavuođa bivdin, tuvravázzin dahje earáin geat leat leamašan guovllus.
– Mii háliidit dieđuid mat sáhttet guoskat áššái, jus leaš gullan beatnagiid ciellame ja báhčima, oaidnán olbmuid geat eai gula bivdojovkui geas lea ealgaválla guovllus dahje eará mii sáhttá politiijaid beroštumis. Riŋges politiijaide tlf. 02800 dahje sádde midjiide dieđu, čállet sii Facebook:i.
Čakčamánu loahpas lea Nordlánddas ain riikka vuolimus bargguhisvuohta, 1,3% áibbas bargguhisvuohta.
NAV čállá preassadieđáhusas ahte lea vuorjašuhtti go sisafárrejeddjiid gaskkas lea 4,0% bargguhisvuohta, go muđui álbmogis lea 0,9%.
Registrerejuvvon bargoohcciid gaskkas leat 39% sisafárrejeaddjit ja eatnasat sis bohtet riikkain olggobealde EU/EØS.
- Mii oaidnit dál ahte ukrainalaččat geat leat boahtán Norgii maŋemus jahkebeale, dieđihit iežaset bargomárkanii, dadjá Nordlándda NAV direktevra, Cathrine Stavnes preassadieđáhusas.
Čakčamánus almmuhuvvojedje 1719 iešguđet virggi Nordlánddas.
Riikkas obbalaččat lea 1,8% bargguhisvuohta.
Jill Abelsen Olsen lea virgáduvvon Romssa sámi viesu vuosttaš beaivválaš jođiheaddjin.
Abelsen Olsen álgá virgái čavčča mielde ja lea vuos virgáduvvon jahkái, muhto lea vejolašvuohta guhkidit virggi.
Sápmelaččat Romssas leat fargga njealljelot jagi niegadan sierra sámi viesu oaččut gávpogii.
Abelsen Olsen bargá seniorráđđeaddin Nationála sámi gealboguovddážis, mii lea oassin mánáid-, nuoraid- ja bearašdirektoráhtas.
– Romssa ássin ja sápmelažžan lea hui somá oažžut bargofálaldaga Romssa sámi viesu beaivválaš jođiheaddjin. Mun illudan álgit dán bargui. Dát lea munnje buorre vejolašvuohta beassat bargat sámeáššiiguin dákkár dehálaš gávpogis mearrasámi guovllus, dadjá son.
