"Boazolihkku" jávkada ovdagáttuid

Dutki oaivvilda NRK TV-ráiddu "Boazolihkku" jávkadit daid ovdagáttuid mat olbmuin sáhttet leat

Berit Marie Eira

Berit Marie Eira Boazolihkku TV-ráiddus.

Foto: Hans Børge Hartvigsen / NRK

Bures badjil 600 duhát olbmo gehčče juohke oasi "Boazolihkku" TV ráiddus NRK1:žis. – Dát TV ráidu sáhttá jávkadit olbmuid ovdagáttuid nu ahte norgalaččat heitet duolbmamis boazoealáhusa, lohká duŧki Ivar Bjørklund.

-"Boazolihkku" čájeha boazodoalu rivttes láhkai

Olbmuid oainnuid rievdada

Sosialantropologa Ivar Bjørklund Tromssas oaivvilda NRK TV-ráiddu rievdadan olle Norgga álbmoga oainnu sápmelaččaide ja boazodollui.

– Eanaš áššit TV:s ja eará mediain boazodoalu birra, ovdanbuktet bohcco ja boazodoalu dego luonddugoarideaddjin, čilgesta Ivar Bjørklund.

Ollu geahččit

Dat gávccát ja maŋŋemuš "Boazolihkku" prográmma manai mannan sotnabeaivve NRK1 kanalas, ja gaskamearálaččat leat 618 000 olbmo geahččan prográmma. Dát lohkku lea birrasi 40 proseantta TV gehččiin sotnabeaivve.

NRK dutkanhoavda Kristian Tolonen lohká hirbmat bures dáhkkon beassat buoremusaid searvái.

Oččot visot

Kristian Tolonen lohká "Boazolihkkus" visot maid norgalaččat hálidit oaidnit, nu go čappa luondu ja beakkálmasat maid.