Dat mearriduvvui dilálašvuođas mii duorastaga lágiduvvui Ohcejogas ja gos ságastalle soahpamušas. Guovllu olbmot sávvet ahte bastet buorebut váikkuhit ođđa soahpamuššii go čállet oktasaš cealkámuša dan sadjái go máŋga sierra cealkámuša.
Dilálašvuođas máŋga ohcejohkalačča ja deatnulačča geavahedje sáhkavuoruid ja oaivvildedje ahte oktasaš cealkámušas soaitá leat stuorát váikkuhus.
– Jurdda lei dat, ahte mii čállit cealkámuša, masa mii fidnet buot daid mielde, geain leat bivdon cealkámušat. Ja dat lei buorre, ahte Norgga beale olbmot sáhttet searvat dasa, dadjá ohcejohkalaš Veikko Porsanger Yle Sápmái.
– Dat lea imaš, jus vel guovtte beal Deanu olbmot leat ovttamielalaččat ja jus das ii leat miige árvvuid, de ii leat mastige árvu, Porsanger joatká.
Geahpidit bivddu
Deanu čázádagas áigot geahpidit luosabivddu 30 proseanttain, nu leat Norgga ja Suoma eiseválddit mearridan. Njealji jagi šiehtadallamiid maŋŋá, riikkat evttohit ahte boahtte jagi rájes vuvdojuvvojit 22.000 jándoroaggunlobi jahkái oktiibuot. Dál ii leat mihkkege meriid man olu oaggunlobiid sáhttet vuovdit. Dál áigot eanet ráddjet buot bivdovugiid.
Báikkálaš olbmuin Deanuleagis orro olu vuosteháhku ođđa Deanu soahpamuššii, ja máŋggas ballet earret eará ahte árbevirolaš bivdokultuvra jávká.
Nubbi álbmotčoahkkin
Bearjadaga suoidnemánu 8. beaivve lágiduvvo nubbi dieđihan- ja ságastallandilálašvuohta Deanu soahpamuša birra Gáregasnjárggas norgga áiggis golmmas Gilidállu Sáivvus.
Olbmuin ja servviin lea vel veahá áigi ovddidit cealkámušaid Deanu soahpamuššii go cealkináigi nohká borgemánu 5. beaivvi.