Gieskat lea "Boazodoallosámit" girji ilbman. Girjjis čállá Elle Pier Piera Uvllá Øyvind, Øyvind Ravna, Finnmárkku johttisámiid eallimis, sihke dálá- ja ovddešáiggis.
Márroš-siida
Ravna čállá Márroš-siiddas birra. Dát lea siida badjealbmá Anders A. Smuk maŋis.
Stuorra rievdadusat
Son čállá stuorra rievdadusain mat čuhce boazodollui maŋŋilgo Ruošša ja Suoma ráját giddejuvvojedje. Nu eai sáhttánge Várjjat-siiddat šat johttit Giehkirnjárgga, Anárjávrre ja Várjjatnjárgga gaska.
Čuovvu jahkodagaid
Girječálli čuovvu boazodoalu dálááiggis gávcci jahkodaga bokte, dan rájes go áldu njoallu miesi miessemánus, ja go merkot, njuovadit, rátketdálvesiiddaide ja dasságo fas johttájit giđđat.
Oahpásmuvvat árbevirolaš bargui
Elle Pier Piera Uvllá Øyvind, Øyvind Ravna girji Boazodoallosámit
Dán girjjis oahppásmuvvat boazosámiid árbevirolaš bargui, nugo boazodoallu dán áiggis jođihuvvo ođđaáigásaš teknologiijan, heivehuvvon áiggi ja luonddu ektui.
Olu govat
Girjjis leat olu govat sihke dálá ja ovddeš áiggis. Ravna lea ieš olu govven.
Guovtti gillii
Teaksta dán girjjis lea sihke sámi- ja dárogillii. Dás lea teaksta mii govvida boazodoalu nugo dat áiggiid čáđa lea jođihuvvon ja nugo dat dál jođihuvvo.
Gii girječálli lea
Elle Pier Piera Uvllá Øyvind, Øyvind Ravna, lea Deanus Finnmárkkus eret. Son lea čállán čieža girjji ja lea leamaš mielde ráhkadeamen máŋga dokumentárafilmma. Filmmat ja maŋimuš girjjit govvejit ruošša davviguovllu eamiálbmogiid dili. Son lea cand. agric oahppu váldán Norgga Eanadoalloallaskuvllas. Lea maiddái lohkan sámi kulturfága Romssa Universitehtas, ja dál bargá son Romssa Universitehta Juridihka fákultehtas doavttergrádadutkosiin, mas son guorahallá boazodoallorievtti.
