NRK Meny
Normal

Čájehit sámi valáštallama Lillehammeris

Bearjadaga ja lávvordaga besset Nuoraid Olympiagilvvuid oasseváldit oahpásmuvvat sámi valáštallamiin Lillehammeris.

Camilla Mudenia ja Torill Lindseth Wigelius

Camilla Mudenia ja Torill Lindseth Wigelius lohkaba iežaset bures ráhkkanan sámi valaštallama čalmmustahttimii Lillehammeris.

Foto: Privat

– Dálveolympiagilvvuid áigge 1994:s juo leimmet bovdejuvvon Lillehammerii čájehit sámi valáštallama ja dál fas leat bovdejuvvon deike, dat gal lea áibbas somá, lohká Torill Wigelius, guhte Deanu searaid valáštallansearvvi bealis lea dollen Lillehammerii.

Golmmain herggiin, sabehiiguin ja suohpaniiguin áigot moadde sámi nuora čájehit sámi dálvevaláštallansurggiid. Sámi nuorat áigot čuoigat ja njoarostit, ja herggiiguin vuodjit gilvvu.

Guovvamánu 12. beaivvi álge Nuoraid Olympiagilvvut Lillehammeris Mátta-Norggas ja dat bistet sotnabeaivái. 1100 valaštalli 70 riikkas oassálastet gilvvuin.

Gávttit heargevuoddjiin

Lillehammer sámi searvi dat lea bovden sámi nuoraid Lillehammerii, ja Nuoraid Olympiagilvvuid lágideaddjit leat čáhkken saji sámi valáštallama čalmmustahttimii.

Moadde tiimmu bearjadaga ja lávvordaga dat lea várrejuvvon dása namalassii seamma sajis gos čuoiganvaláštallamatge leat dáin OG-gilvvuin.

Guokte nuora galget gilvalit heargevuodjimis ja sutnos lea goappašagain vel gávttit badjelis. Nuorat geat čuiget ja njoarostit gilvalit valáštallanbiktasiiguin.

tente OL-ilden

Prinseassa Ingrid Alexandra cahkkehii spáiddáriin Nuoraid Olympiagilvvuid dola Lillehammeris mannan bearjadaga.

Foto: Olsen, Geir / NTB scanpix

– In leat balus

Wigelius, guhte olu jagiid maid lea bargan Sámi valaštallanlihtu (SVL) ovddas, sávvá ahte geahččiid mielas lea miellagiddevaš oaidnit movt sámit valáštallet.

– Sámi valáštallamii lea dehálaš ná beassat čájehit nuoraide miehtá máilmmi mo mii davvin valáštallat, lohká Wigelius.

17-jahkásaš Deanu nieida, Camilla Mudenia, lea okta dain nuorain guhte galgá čuoigat ja njoarostit. Son sakka illuda dása.

– In leat balus, mon gal duođaid dušše illudan dása, lohká Mudenia.

Sámi nuorat geat dás oasálastet leat Kárášjogas, Deanus ja Unjárggas eret.

– Besset geahččalit heargevuodjima

Klemet Amund Eira dat lea herggiid buktán Kárášjogas Lillehammerii. Guokte nuorra sámi gándda galgaba vuodjit herggiiguin.

Eira lea ilus go sámit leat ožžon dán vejolašvuođa guhkes mátkki gussiide čájehit árbevirolaš sámi valáštallama.

Sis lea maid hástalus geahččiide.

– Jos dál muhtin dain eará nuorain duostá geahččalit vuodjit, de lea datge vejolaš, lohká Eira.

Son lea váldán mielde herggiid mat leat lojit, ja mat leat oahpahuvvon dákkár doibmii.

Klemet Amund Eira

Klemet Amund Eira ii leat Lillehammerii fievrán gal iežas falimus gilvovuodjen herggiid.

Foto: Privat